Мектепте 30 жыл еңбек атқарған мұғалімдер аттестация кезінде тестілеусіз екінші кезеңге өтеді.

Қазіргі ереже бойынша педагог аттестацияның екі кезеңінен өтуге тиіс. Біріншіден, пән мен оқыту әдістемесін білуге арналған тест тапсырады. Екінші кезекте педагог портфолиосымен және жетістіктерімен бөліседі.  

Бұл ретте Асхат Аймағамбетов ұлттық біліктілік тестіне қатысты келесі өзгерістердің болатынына сендірді.

Ең алдымен, әдістеме бойынша тестілеу сұрақтарын қамтитын толық тақырыптар мен әдебиеттер барлығына қолжетімді болады.

Педагогикалық өтілі 30 жыл және аттестация жүйесі бойынша санаты бар педагогтар біліктілік тестілеуден босатылады. Олар аттестацияның екінші кезеңінен ғана өтеді, яғни портфолио тапсырады. Бұл ретте егер олар біліктілік санатын көтергісі келсе, онда аттестация жалпы негізде өтеді. Мысалы, 30 жылдық еңбек өтілі бар педагог-сарапшы өз санатын растаса, аттестациядан тек екінші кезеңнен ҰБТ-сыз өтеді, ал арттырғысы келсе қосымша ҰБТ тапсырады.

30 жыл еңбек еткен, бірақ ескі аттестаттау жүйесі бойынша жоғары, бірінші санатты педагогтар, «педагог-модератор» санатына ауысатын болса, онда олар біліктілік тестілеуден өтуден босатылады. Бұл жағдайда олар аттестацияның екінші кезеңінен өтеді, яғни портфолио тапсырады. Ал егер бұл педагогтер аттестацияның жаңа жүйесі бойынша басқа санаттарды алғысы келсе, онда аттестация жалпы негізде өтеді.

30 жыл мектепте жұмыс істеу – нағыз ерлік. 30 жыл бойы жұмыс істеп, балалардың алдында аянбай еңбек еткен педагогтерді аттестация кезінде тестілеусіз екінші кезеңге өткізуге шешім қабылдадық. Мұғалім тек портфолиосын тапсырады. Біз 30 жыл бойы жұмыс істеп келген мұғалімге сенуіміз керек. Оларды үлкен стресске апармай, екінші этаптан ғана өтуге мүмкіндік беріп отырмыз, 

деді министр.