Қарағанды облысындағы Ленин атындағы шахта іске қосылған 58 жылдан бері онда 69 адам қаза тапқан. Бұл туралы ҚР Төтенше жағдайлар министрі Юрий Ильин мәлім етті.

Апат жиі тіркеліп, қаншама кеншінің өмірі қиылса да, Ленин шахтасын жабу жоспарланып отырған жоқ. Қарағанды облысының әкімі Жеңіс Қасымбектің айтуынша, аталған шахтада әлі 10 жылға жететін көмір қоры бар.

Шахта консервацияланбайды. Мұндағы жұмыстар комиссия жұмыс істеп тұрған кезде ғана тоқтап тұрады. Апат себептері анықталғаннан кейін және салдары жойылғаннан кейін шахта әрі қарай жұмыс істей береді,

деді әкім.

Аймақ басшысы аталған шахтаның «ресурсы аяқталуға жақын» деген мәліметтерді жоққа шығарды.

Шахтаның ресурсы деген ұғым жоқ. Егер қазуға болатын көмір болса, көмір қоры жұмыс істеуге мүмкіндік беріп тұрса, бүкіл көлем толық қазып алынғанша шахта жұмыс істей береді. Мамандардың дерегі бойынша, бүгінде бұл шахтадан 10 млн тоннаға дейін көмір қазып алуға болады. Орта есеппен жыл сайын 1 млн тонна көмір қазып алады десек, 10 жылдың жұмысы бар деген сөз. Оның өзінде қосымша қатпарларды барлап, игермейтін болса осындай мерзім бойы жұмыс істейді,

деді Жеңіс Қасымбек.

Жалпы, Тәуелсіздік жылдарында Қазақстанның көмір кеніштерінде 10-нан астап ірі апат болып, салдарынан 150-ден астам адам қаза тапқан.