Ақтөбеде анасы мен баласын өз үйінде бауыздап кеткен. Әйелдің жасы 35-те, бала 16-да. Ал 13 жастағы қыз ауыр жарақатпен ауруханаға жеткізілген. Қазір жансақтау бөлімінде. Бұл жантүршігерлік қылмысты кім жасағаны белгісіз. Полиция тергеу тексеру жұмыстарын жүргізіп жатыр, деп хабарлады «Астана» телеарнасы.

Жалғызбасты келіншек екі баласымен осы үйдің екінші қабатында тұрған. Көршілер түнде ешқандай айқай-шу естімедік дейді. Тек жедел-жәрдем, полиция келгенде не болғанын бір-ақ білген.

Келген жедел тергеу тобы пәтерден 35 жастағы әйелдің және 16 жастағы ұлының зорлық белгілері бар мәйітін тапты. Сонымен қатар қаза тапқан әйелдің он үш жасар қызы балалар ауруханасының жансақтау бөліміне жатқызылды,

дейді облыстық ПД баспасөз қызметінің жетекшісі Ерболат Сарқұлов.

Сафия мойын тұсынан бес жерден пышақталған. Операция жасалды. Қазір баланың жалпы жағдайы тұрақты ауыр. Реанимация бөлімінде жатыр.

Марқұм әйел алты жыл бұрын күйеуімен ажырасқан көрінеді. Сол бұрынғы жолдасы да күні кеше өзіне-өзі қол салыпты. Артынша отбасында мынадай жағдай болып отыр.

Таңғы сағат жеті шамасында тергеу бөлімінен адамдар келіп, үлкен ұлымды алып кетті. Қайғылы оқиға туралы сол кезде бір-ақ білдім. Кеше ғана Софияның әкесі-менің ұлым өзіне қол салып, қайтыс болған еді. Жарақат алған немерем ғана тірі қалды. Оны әлі маған көрсетпеді,

дейді Софияның әжесі Татьяна Игнатьева.

Полицияға қыз бала телефон шалып көмек сұраған. Бұл оқиғаға қатысты кісі өлтіру бабымен қылмыстық іс қозғалды. Әзірге күдіктілер табылмады. Күрделі отадан шыққан 13 жастағы Софияның палатасына күзетші қойылған, есін жиған соң ғана оқиғаның мән-жайы белгілі болмақ.