Соңғы 25 жылда сыбайлас жемқорлық әрекеттері арқылы елімізден шамамен 160 миллиард теңге заңсыз шығарылған. Сарапшылардың пайымы осындай, деп жазады inbusiness.kz.

Енді осындай шетел асқан автивтерді іздестіру, қайтару шаралары арнайы заңмен реттелмек. Мәжіліс құжатты бірінші оқылымда мақұлдады. Құжатқа сәйкес, активтерді қайтару ерікті және мәжбүрлі түрде жүзеге асады. Онымен арнайы құрылған комиссия мен мемлекеттік қор айналыспақ. Оған қоса заңды және жеке тұлғалардың реестрі құрылады.

Егер мониторинг қорытындысы бойынша, құны 100 млн АҚШ долларынан асатын активті сатып алудың заңдылығына байланысты күмән туса, уәкілетті орган субъектіні реестрге енгізу мәселесін комиссияның қарауына шығарады. Ал, күдікке ілінген азамат активтері туралы ақпарат беруге, яғни декларацияны тапсыруға құқылы.

Егер адам декларацияны тапсыру арқылы өз активтерін қайдан алғанын растай алмаса немесе декларацияны табыс етпесе, мұндай активтер негізсіз байлық ретінде танылып, мемлекет кірісіне қайтарылуы мүмкін,

деді ҚР Парламенті Мәжілісінің депутаты Елнұр Бейсенбаев.