Алматыда Мыңбаев пен Әуезов көшелерінің қиылысында су құбыры жарылып, бірнеше көшені су басты.

Қалалық коммуналдық инфрақұрылымды дамыту басқармасы хабарлағандай, су түнгі сағат 3.40-тан бастап (негізінен Әуезов көшеснің бойымен) іргелес көшелермен төмен қарай ағып, Райымбек даңғылына дейін жеткен, одан ары канал желісіне құйылып жатыр.

Көктайғақтың алдын алу үшін Алматы тазалық МҚК қызметкерлері жол бойына 18 құмсепкіш көліктің күшімен, тротуарларға 4 тротуар тазалаушы көлікпен көктайғаққа қарсы материал себуге кірісті.

Су мұзға айналып, тротуарлар мен жолдар көктайғаққа айналып жатыр. Мұз басқан жол бөліктеріне арнайы материалдармен себілгенімен, ол аумақтарда апат қаупі әлі де жоғары болып тұр.

Апаттың салдары бүгінгі күннің аяғына дейін реттелетін болады.

Су басқан орындарда көктайғақ жабынының пайда болу ықтималдылығын ескере отырып, жүргізушілерді жылдамдықты азайтып, көлік арасындағы арақашықтықты ұлғайтып, апатты жағдайды туындатпас үшін оқыс әрекеттер жасамауға шақырамыз,

деп басқарма өкілдері алматылықтарға үндеу жолдады.