Қазақ елінде қазір 550 мыңнан астам көпбалалы отбасы тіркелген, 493 мың отбасы 4 және 5 бала тәрбиелеп отыр. Бірақ бұл отбасылар үлкен балалары 18 жасқа толғаннан кейін жәрдемақыдан айырылады. Ал көпбалалы ана мәртебесі тіпті қарастырылмаған.

Осы мәселені көтерген депутат Гаухар Танашева «Алтын және Күміс алқа» жалғасы ретінде «Кола алқа» наградасы немесе, «Ана Даңқы» наградасы(ІІІ дәрежелі «Ана Даңқы» 4 және 5 баланы,  ІІ дәрежелі «Ана Даңқы» 6 баланы, I дәрежелі «Ана Даңқы» 7 және одан да көп бала туған немесе асырап алған аналарға) енгізілсін деген сауал жолдады:

«Алтын алқа», «Күмiс алқа» алқасымен жеті, алты бала туған және тәрбиелеп өсiрген аналар жетінші, алтыншы «баласы бiр жасқа жеткен және басқа балалары тiрi болған ретте наградталады»  деген шарты алып тасталсын немесе осы шартта баланың жасын алты айға толғанға дейін қысқарту қарастырылсын. Себебі құжаттарды рәсімдеу 1,5 жылға дейін созылады.

«Ана Даңқы» немесе «Қола алқа» мәртебесі бар көпбалалы аналарға Алтын және Күміс Алқа алып жатқан бірқатар үй, көлік, мүлік салықтар мен мемлекеттік баждарды төлеуден босату бөлігінде жеңілдіктер берілсін.

Қолданыстағы Әлеуметтік кодексіне «Ана Даңқы» немесе «Қола алқа» ордендерімен марапатталған аналарға мынадай мөлшердегі жәрдемақы қарастырылсын:

• ІІІ дәрежелі «Ана Даңқы» немесе «Қола алқа» иегерлеріне – 5,40 айлық есептік көрсеткіш (18 630тг).
• ІІ дәрежелі және I дәрежелі «Ана Даңқы» иегерлеріне Алтын алқа (25030 тг), Күміс алқа (22080тг) алып жатқан жәрдемақы мөлшерінде қарастырылсын.

I, II және III дәрежелі «Ана Даңқы» немесе «Алтын алқа», «Күміс алқа», «Қола алқа» ордендерімен марапатталған аналарға қосымша келесі жеңілдіктер қарастырылсын:

• Жылына 4 пайыздық мөлшерлемемен «Отбасылық автокөлік» жеңілдетілген автонесие бағдарламасы құрылсын.
• Қазақстанның барлық қалалары бойынша қоғамдық көлікте тегін жүру
• Темір жол және әуе тасымалдауларына  50% жеңілдік қамтамасыз етілсін.
• Айына бір күн бүкіл отбасымен мұражайларға, мәдени және демалыс саябақтарына, хайуанаттар бақтарына, көрмелерге тегін бару қамтамасыз етілсін.