Қарағандыда алты жасөспірім жас қызды зорламақ болған ер адамды ұрып өлтірді деп айыпталып, әрқайсысы жеті жылға жуық мерзімге сотталып кетті.

«Вечерняя Караганда» басылымының жазуынша, 4 қаңтарда Қарағанды ​​соты алты айыпталушының әрқайсысын жеті жылға жуық мерзімге бас бостандығынан айырды. Сотталушы жеткіншектердің ата-аналары педофилді өлтірген басқа біреу екенін айтып шу көтерді. Олардың балалары тек ұрып-соққан.

Оқиға 2,5 жыл бұрын Қарағандыдағы Майқұдық шағынауданында болған. 2020 жылдың 28 мамырында жергілікті тұрғын 14 жасар қызды зорламақ болған. Кейін ол болған жайтты құрбысына айтып, достарынан педофилге сес көрсетуді өтінген. Кейіннен алты жасөспірім гараж аумағында аталған ер адамды кездестіріп, оны соққыға жыққан.

Ата-аналар Жоғарғы сот пен Президенттен көмек сұрап отыр:

Оқиға сағат 18:00 шамасында болған. Сол кезде ер адам мас болмаған, соққыдан соң ол үйіне кеткен. Араға бес сағат салып, сағат 23:00-де оның денесі Майқұдықтағы автовокзал маңынан табылды. Ер адам қанға боялып жатқан, оның алкогольді ішімдік ішкені анықталды. Біздің жанайқайымызды ешкім естіп жатқан жоқ. Біздің балаларымызға кісі өлтірді деген айып тағылды. Ол кезде олар кәмелетке толмаған, 16 жаста болатын. Ер адамның денесінде қатты көгерулер, жарақаттар болған, біздің балаларымыз оны солай қатты ұрмаған.

Сонымен қатар сот сотталушылардың кінәсі қылмыстық іс материалдарымен, атап айтқанда, оқиға болған жерді қарау, айғақтарды оқиға орнында тексеру, беттестірулер, куәлардың айғақтарымен, сарапшының, заттай дәлелдемелердің, бейнежазбаның, сот-видеофонографиялық, сот-медициналық сараптамалардың қорытындыларымен дәлелденді деп есептейді.

Сотталушылар Қылмыстық кодекстің 106-бабының 3-бөлігімен кінәлі деп танылып, оларға алты жыл сегіз айға бас бостандығынан айыру жазасы тағайындалды, олар қылмыстық-атқару жүйесінің орташа қауіпсіздік мекемесінде өтеу жазасына кесілді,

деп хабарлады соттың баспасөз қызметі.

Сонымен қатар сотталушылардан жәбірленуші тараптың пайдасына 10 млн теңге моральдық залал бірлесіп өндірілді. Үкім заңды күшіне енген жоқ.