Ана тілімізді сыйлау ең басты аспект. Европаның қай еліне бармасаңыз да сол елдің тілінде сөйлеу маңызды. Бұл ешқандай «әсіре ұлтшылдық», басқаны нақақ кемсіту емес. Бұл пікірді ҚР Парламенті Мәжілісінің депутаты Ерлан Саиров өзінің фейсбук парақшасында қалдырды.

Қазақ тілі жөнінде. Кеше, желіде сырттан келген қонақ тағы да қазақ тілі жөніндегі мәселені қоздырып қойды. Басқа елге келіп, «қонақ» болудың қалыптасқан ережелері бар. Европада, Франция, Германия, Польша басқа да елдерге барып, тұрақтағыңыз келсе, ең бірінші сол елдің тілін білуге міндеттісіз. Бұл «өркениетті» деп аталатын елдер үшін қалыпты жағдай. АҚШ-қа барсаңыз ағылшын тілін білу аксиома.

Қазақстанға да көптеген азаматтар келіп жатыр. Қазақстан мемлекеті гуманизм тұрғысынан бұл азаматтарды қабылдады. Ол азаматтар да біздің елде ешқандай фобияның жоқтығына көзі жетті. Дегенмен, Қазақстанға келгенде біздің дәстүрді сыйлап, жергілікті халықтың басымдықтарына назар аударып, ұрымтал жерге «сүйкенбеген» абзал,

деп жазды депутат.

Саировтың айтуынша, Қазақстанға келгеннен кейін, қазақ тіліне зейін бөлу адамгершілік тұрғысынан дұрыс болады.

Біздің елде, құдайға шүкір «әсіре ұлтшылдық», тұрмыстық деңгейде тіл мәселесінде кемсіту жоқ. Біздің мәдениет сондай. Бірақ бұл жағдай тіл мәселесінің өзектілігін жоғалтпайды. Ал, біздің ана тілімізді қадірлеу әр-бір қонақтың жоғары мәдениетінің көрсеткіші. Біз екі тілді еркін меңгергенбіз ғой. Ешқандай айқай-шуға салынбай, агрессия жасамай, өктемдік көрсетпей келген азаматтарға осы мәселені ыждаһатпен, парасатпен түсіндіріп отырған дұрыс. Кей кездері парасатпен, жоғары мәдениетпен, ақыл-оймен жеңетін мезет болады. Бүгін дәл сондай кез,

дейді Ерлан Саиров.