Ұлттық экономика министрі Әлібек Қуантыров Қазақстан экономикасын дамытудың 2023-2027 жылдарға арналған үш ықтимал сценариін ұсынды.

Микроқаржы ұйымдарының консенсус болжамы бойынша, 2022 жылы мұнайдың әлемдік бағасы барреліне $104,2 деңгейінде болуы мүмкін. 2023 жылы әлемдік экономиканың өсімі 3% болады.

Сыртқы және ішкі параметрлердің өзгеруіне байланысты Қазақстан экономикасын дамытудың 2023–2027 жылдарға арналған үш сценариі әзірленді.

Базалық сценарий бойынша, мұнайдың орташа бағасын барреліне $85 деңгейінде және доллардың болжамды бағамын 470 теңге деңгейінде пайдалану ұсынылады. Осы сценарий бойынша ЖІӨ-нің орташа жылдық нақты өсімі 3,9%, оның ішінде 2023 жылы 4% болады,

деді Ұлттық экономика министрі Әлібек Қуантыров үкімет отырысында.

Оптимистік сценарий бойынша, мұнайдың болжалды бағасы барреліне $110, доллар бағамы 440 теңге болып белгіленді. Экономиканың орташа жылдық өсімі 4,2% деңгейінде болады деп болжанып отыр.

Пессимистік сценарий мұнай бағасы барреліне 60 доллар болады деп болжайды. ЖІӨ-нің болжалды нақты өсімі орта есеппен 3,5% болады,

деді министр.

Әлібек Қуантыров болжам 2021 жылғы экономикалық өсім туралы қорытынды мәліметтерді, халықаралық қаржы ұйымдарының әлемдік экономиканың өсуіне және экспорттық тауарлар бағасына қатысты не күтетіні ескеріле отырып жасалғанын айтты.