Веб-сериал өткенімен өмір сүріп, өз-өзін жақсы көруден қалған ана туралы.

Сюжет бойынша, “Шеше” веб-сериалының басты кейіпкері Шынар есімді жалғыз басты ана балаларының жағдайын жасаймын деп, үнемі күйзелісте жүріп жаман ауруға шалдығады. Ол кенеттен өмірінің аяғына дейін 3 ай ғана қалғанын біліп, тезірек балаларына үй алып беру үшін жанталасады. Шынардың шалдыққан ауруы қазіргі таңда қоғамдағы әйелдердің көпшілігінде кездесетін, сүт безінің қателі ісігі болып шығады.

Жобаның сценарисі әрі Salem social media-ның креативті продюсері Бұхар Марат веб-сериалға дайындық барысында сүт безінің қатерлі ісігіне шалдыққан адамдардың көп екенін, тіпті кастингке келген актрисалардың басынан осындай жағдай өткені туралы айтты.

“Біз бұл жобаның жалпы дайындығына бір жылдан астам уақыт жұмысадық. Идея түрінде біраз талқыланып, кейінен сценарий жазуға кірістік. Тақырыпты зерттеу барысында өзімде онкологиялық орталықта болдым. Қатерлі ісікпен ауыратын адамдармен, ауруды жеңіп шыққан жандармен сөйлестім. Олардың сезімін, не ойлайтындарын барынша жобаға қосуға тырыстық. Ең қызығы біз кастинг өтікізіп жатқан уақытта, бірнеше үміткер актрисалар келіп өздерінің өмірлеріне ұқсайтынын айтты. Өз басында, болмаса жақынының осындай жағдайға тап болғанын айтып, тіпті оқиғаны естіп отырып жылағандар да болады. Сондықтан елімізде бұл мәселе өзекті болғандықтан,  сүт безінің қатерлі ісігі туралы жоба түсіріп жатырмыз,

деді веб-сериалдың сценарисі Бұхар Марат.

«Шеше» сериалы 12 бөлімнен тұрады.