Орта тап дегеніміз кімдер?

Naryk.kz ол сұраққа былай деп анықтама беріпті:

Ресми мәлімет бойынша айлық табысы жоғары, сапалы тауарлар мен қызметтерді сатып алуға, ипотека төлеуге, ақша жинауға, лайықты білім алуға және бос уақытын тиімді өткізуге мүмкіндік алып жүрген жұмыскерлерді орта тап өкілдеріне жатқызуға болады.

Қазақстанда олар бар ма? Бар болса, алатын табысы қанша?

Өзінің кезекті зерттеу жұмысында Алматы мен Астана қалаларын мысалға алған Jusan Analytics зерттеу орталығы осы сұрақтарға жауап беруге тырысыпты.

Дамыған елдерде орта тап өкілдері табысының 40-50%-ын күнделікті қажеттілігіне жұмсайды. Сондықтан, біз орта тапқа еліміз бойынша 700 мыңнан 1,2 млн теңгеге дейін жалақы алатын жұмыскерлерді жатқыздық.

Еңбек ресурсын дамыту орталығының деректері бойынша, Алматы мен Астанада жұмыспен қамтылғандардың тек 4,4%-ы ғана 2022 жылы осындай жалақы алып келген.

Орта тап өкілдеріне – Астанада 600 мыңнан 1,2 млн теңгеге дейін, ал Алматыда 700 мыңнан 1,5 млн теңгеге дейін жалақы алатындар жатады.

Олардың күнделікті шығынына айлық табысының 40-50%-ы жұмсалады.

Астанада орта таптың ауқымы Алматыға қарағанда 2 есе жоғары. Елордада бұл тапқа жұмыскерлердің 8,1%-ы, ал Алматыда 4,7%-ы жатады.

Ірі қалаларда жұмыспен қамтылғандардың 90%-дан астамы орта тапқа жатпайды. Әлеуметтік жағынан ең төмен қамтылған азаматтар мен ең жоғары қамтылғандар арасында табыс бойынша айырмашылық – 10 есе. Бұл, қоғамда әртүрлі тап арасында теңсіздік басым екенін көрсетеді.

Жоғары инфляция да жеке қаржылық тұрақтылыққа және ақша жинақтауға кедергі келтіреді. Айтпақшы, Ұлттық статистика бюросы хабарлайды: Қазақстанда орташа айлық жалақы бір жылда 17%-ға өскен.

Дереккөз: Қаржылық Сауат.