Бір жыл ішінде ипотекалық несиелер көлемі бірден 46%-ке өсіп, сектордағы мерзімі өткен несиелер үлесі портфельдің 1%-тен азына дейін төмендеді.

Биыл тамыз айына дейін Қазақстан экономикасына берілген несие көлемі 20,36 трлн теңге болды. Бұл бір жыл бұрынғы көрсеткіштен 27,1%-ке артық. Несие нарығының негізгі драйвері — ипотека. Азаматтардың тұрғын үй салуға және сатып алуға берген несиелерінің көлемі бір жылда 46,3%-ке, бірден 4,16 трлн теңгеге өсті. Бұл экономикаға берілген несиелер портфелінің 20,4%-іне тең.

Айта кетерлігі, ипотекалық сегменттегі мерзімі өткен несиелер көлемі небәрі 36 млрд теңге болды. Бұл бір жыл бұрынғыдан 26,4%-ке аз. Ипотекалық несие портфеліндегі мерзімі өткен кредит бір жыл бұрын 1,7% еді, биыл 0,9%-ке төмендеді.

Ипотеканың мұндай көрсеткіштерінде, яғни портфельдің өсуі мен оның сапасын қатар жақсарту кезінде тұрғын үй құрылыс жинақтары жүйесі (ТҚЖЖ) бойынша жұмыс істейтін «Отбасы банкі» маңызды роль атқарады. Биыл шілде айының қорытындысы бойынша азаматтардың тұрғын үй салуға және сатып алуға берген несиелерінің жалпы көлеміндегі екінші деңгейлі банктер үлесі 61,8% болды. Былтыр 57,8% еді, 5 жыл бұрын 34,4% болған.

Сонымен бірге, «Отбасы банкі» портфелі сапасы бүкіл банк секторындағы ең жақсы көрсеткіш болып отыр. Биыл 1 тамызға дейінгі ақпарат бойынша, банк портфеліндегі 90 күннен астам мерзімі өткен төлемдері бар несиелер (NPL 90+) үлесі 0,07% қана болды. Салыстыру үшін: жалпы сектор бойынша көрсеткіш 3,84%, яғни 55 есе көп.