13 ақпандағы жағдай бойынша өңірлерде 150 тонна гуманитарлық көмек жиналып, Түркияға жіберілді. Жалпы 32 млн теңге жиналып, тікелей Afad қорына аударылған.

Сонымен қатар, қазақстандықтар Кахраманмараш қаласына 100 қазақ үй тігіп жатыр.

Алғашқы отыз үйді 14 ерікті қазақ жігіті «Kilavuzlu mesire alani» ұлттық паркіне тіге бастады. Этноауыл ретінде үйлер толық тігілген соң Қазақстан халқының атынан қамкөңіл түрік ағайынға ас беріледі. 30 қазақ үй тікелей Түркия билігінің арнайы ұшағымен жеткізілді. Қазақ халқы жинаған қаржыға әртүрлі санаттағы үйлер сатып алынды. Бүкіләлемдік этноспорт қауымдастының өтінішімен Түркия билігі шығарған арнайы ұшақ қалған үйлерді бүгін Алматыдан Ыстамбұлға жеткізеді. Ары қарай Адана қаласы арқылы көлікпен Кахрманмарашқа келеді. Олардың 23-і – 12-16 қанатты салтанатты ағаш үй болса, қалғаны – темірден жасалған.

Түркияға киіз үймен бірге жылыту пештері де жеткізіліп жатыр. Қазақ үйлер палаткадан қарағанда жылы, кең әрі көңілі мұңды, қайғылы жандар өзін баспанада тұрғандай сезіне алады.

Мемлекеттен ешқандай қаржы бөлінбеген. Жеткізу жағын тікелей Түркия жағы мойындарына алған. Қазақ халқы 20 млн теңгеден астам қаражат жинады. 17 млн 300 мың теңгеге 45 киіз үй алынған. Кейін тағы 2 млн 700 мың теңгеге тұрмыстық заттар алынды. Одан бөлек, отандық кәсіпкерлер 50 киіз үй сатып алып, әуежайдың қоймасына жеткізді.