Әлеуметтік желіде 120 адамның қажылыққа барып, далада қалғаны туралы ақпарат тарады. Тіпті дәл осы сапарды ұйымдастырған «Zam-Zam Qazaqstan» туристік компаниясының басшысы Данияр Илиевтің бейнежазбасы қызу талқылануда, деп хабарлайды Uaqyt.info.

Бейнежазба әлеуметтік желіде тараған. Видеода компания директоры Данияр Илиев ештеңе істей алмайтынын айтып, тіпті әділдік талап еткен әйелге тек ер адамдармен сөйлесетінін түсіндіреді. Оның алаңсыз әрекеті жұрттың қызу талқысына түсті.

Көп ұзамай бұл мәселеге Қазақстан мұсылмандар діни басқармасы пікір білдірді. Дерекке сүйенсек, аталмыш компания биылғы қажылыққа апаратын туристік компаниялар тізімінде жоқ.

Қазақстан мұсылмандары діни басқармасы бұған дейін «Zam-Zam Qazaqstan» (заңды атауы – Zam Zam store) компаниясының қажыларға қызмет көрсетуге қатысты тиісті лицензиясы, осы жылы ресми қажылық орындарын алған туроператорлар тізімінде жоқ екенін, сондықтан аталған фирманың қызметіне мүлде жүгінбеу туралы бірнеше рет дабыл қағып, мәлімдеме жариялаған болатын.

Сонымен қатар мүфтият қажыларды осыған дейін алдап, далада қалдырған аталған компанияның заңсыз әрекеттері туралы құқық қорғау органдарына шағым түсірген. Қолдан жасалған қажылық визаларын пайдаланған компания өкілдері шариғат пен заңға қайшы әрекеттерінен әлі күнге дейін тыйылмай келеді.

Қазақстан азаматтарын заңсыз жолмен қажылыққа әкелген «Zam-Zam Qazaqstan» компаниясының жетекшісі Данияр Илиев заң алдында жауап беру тиіс деп санаймыз. Олар шариғат пен заңды белден басумен қатар «мүфтият қажылық квотасын сатады, пара алады» деп жала жабуын доғармай, енді ҚМДБ «жалған қажылық квоталарын» жасады деп шындыққа жанаспайтын ақпарат таратуда. Діни басқармаға жәбір көрген қажылар мен оның туыстарынан жалған құжат жасап, азаматтарымызды заңсыз жолмен қажылыққа  апарған «Zam-Zam Qazaqstan» директоры мен басқа да жауапты өкілдерін неге құқықтық жауапкершілікке тарту бойынша тиісті шара қолданбайды деген сұрақтар мен шығымдар толассыз келіп түсуде. Құқық қорғау органдары осы мәселеге тез арада назар аударып, заң бұзушыларды құқықтық жауапкершілікке тарту бойынша тиісті шаралар қолданады деп сенеміз,

делінген ҚМДБ жауабында.

Сонымен қатар, діни басқарма «ҚМДБ жалған қажылық визаларын дайындады» деп жала жапқан «Zam-Zam Qazaqstan» (Zam Zam store)  компаниясының директоры Данияр Илиевтің үстінен сотқа шағым түсірмек. Себебі компания Алла алдындағы парызын өтеймін деп келген қажыларға қиянат жасаған.

Осы орайда ҚМДБ қажылық конкурсынан өткен, яғни қажылық сапарын ұйымдастыруға қабілетті деп танылған, мүфтият жариялаған тізімге сай туроператорлар қызметіне жүгіну қажеттігін еске салуда.