Мемлекет басшысы еліміздің ауыл шаруашылығы өнімдерінің көлемін және оның қосымша құнын арттыру қажеттілігіне ерекше тоқталды.

Бұл – стратегиялық міндет. Қазір тек бидай мен мал сатып отыратын заман емес

Үкіметке агроөнеркәсіп саласын субсидиялаудың ұзақ мерзімге арналған жаңа тәсілдерін әзірлеуге тапсырма берді. Бюджет қаражаты қайтарылатын болады.

Мемлекет қаржыны оңды-солды шашып, ысырап етуге жол бермейді. Субсидия бөлуге және оның жұмсалуына жүргізілетін бақылауды күшейту керек

Сондай-ақ Тоқаев игерілмей жатқан жерді қайтарып алу жөніндегі комиссияның қызметін жақсартуды тапсырды. Яғни, комиссия жұмысының аясында ауыл шаруашылығы мақсатындағы 2,9 миллион гектар жер мемлекетке қайтарылды.

Жылдың соңына дейін кемінде 5 миллион гектар жерді қайтарып алу жоспарланып отыр. Игерілмей жатқан немесе заңсыз берілген жер көлемі 10 миллион гектарға жуықтайды.

Үкімет пен әкімдіктер келесі жылдың соңына дейін осы жерлерге қатысты нақты шешім қабылдауға тиіс.

Қазір жер мәселесін тексеруге жарияланған мораторий де күшін жойды. Бұл қадам жұмысқа оң ықпалын тигізеді.

Ел экономикасын тұрақты дамытуда су тапшылығы да қатты кедергі болып отырғаны айтылды.
Қазір бұл ұлттық қауіпсіздік мәселесіне айналды. Сырттан келетін су азайып барады. Сол судың өзін тиімсіз пайдалану жағдайды одан әрі ушықтырып отыр.

Судың 40 пайызы құмға сіңіп жатыр. Бұл салада басқа да түйткілдер аз емес. Атап айтқанда, инфрақұрылым әбден тозған. Сондай-ақ, автоматтандыру және цифрландыру деңгейі төмен.

Ғылыми негіздеме жоқ, мамандар тапшы. Бұл мәселелерді шешу үшін Тоқаев Үкімет жанындағы Су кеңесінің жұмысын жандандыруды және білімді сарапшыларды жұмысқа тартуды тапсырды. Сондай-ақ су саласын дамытудың үш жылдық жобасын әзірлеу керектігін айтты.

Қажетті мамандарды даярлау үшін бұл саладағы іргелі әрі мықты жоғары оқу орнын анықтаған жөн.