Батыс Қазақстан облысында апатты жағдайда қонған тікұшақта болған 4 адам қаза тауып, 2 адам зардап шекті. Бұл туралы Азаматтық авиация комитеті хабарлады.

Азаматтық авиация комитетінің мәліметінше, бүгін БҚО-да «Қазавиақұтқару» АҚ тікұшағы апатты жағдайда қонуға мәжбүр болды. Оқиға Чапурино елді мекенінен 6 км қашықтықта болған. Сағат 15:50-де «ҚазТрансОйл» АҚ тапсырысы бойынша құбырды әуеден шолу үшін ұшып шыққан «Қазавиақұтқару» АҚ  Ми-8 тікұшағы жерге қатты екпінмен қонған.

Бортта 5 экипаж мүшесі және 2 жолаушы болған.

Соңғы мәліметтер бойынша, ТЖМ іздеу тобы тікұшаққа жетті. Авиациялық оқиға салдарынан 4 адам қаза тауып, 2 адам зардап шекті. ҚР ИИДМ Азаматтық авиация комитеті қаза тапқан азаматтардың туыстары мен жақындарына көңіл айтады,

делінген хабарламада.

«ҚР Индустрия және инфрақұрылымдық даму министрлігінің көліктегі оқиғалар мен инциденттерді тексеру департаментінің қызметкерлері оқиға орнына барады», –  деп хабарлады комитет.

ҚР Төтенше жағдайлар министрлігінің ресми өкілі Руслан Иманқұловтың мәліметінше, бортта болған 6 адамның бесеуі — экипаж мүшелері, бірі — «ҚазТрансОйл» АҚ өкілі. Қаза болған 4 адамның барлығы — экипаж мүшелері, ҚР ТЖМ-ге қарасты «Қазавиақұтқару» АҚ қызметкері.