Өзбекстан азаматы өзінің бұрынғы ұстазын төл мерекесімен құттықтап, ерекше сыйлық жасады. Бұл туралы Podrobno.uz. сайты хабарлады.

Самарқанд қаласының №1 жалпы білім беретін мектебінде Ана тілі мен әдебиеті пәнін оқытатын Умида Муминова жиһаз және техникамен толық жабдықталған жаңа екі бөлмелі пәтерге ие болды.

Мұғаліміне осындай ерекше жомарт сыйлық жасаған азаматтың видеосы желіде пайда болды.

Белгілі болғандай жомарт азамат жылжымайтын мүлікті сатумен және салумен айналысады екен.

Мен мұнда жаңа үйлер салынып жатқанын естіп, қызығушылық таныттым. Бір қызығы, осы құрылыс компаниясының директоры менің бұрынғы оқушым болып шықты. Бірнеше күннен кейін компания қызметкерлері маған хабарласып, құжаттарымды қалдыруымды өтінді.  Олар мені ерекше тосын сый күтіп тұрғанын жеткізді,

деді Умида Муминова.

Жомарт кәсіпкердің кім екені айтылмаған. Кәсіпкер бұл ісі арқылы барлық мұғалімдерге алғысын білдірді.

Ұстаздар үлкен құрметке лайық. Менің мұғалімім бізді шын ниетімен, адал жүрегімен оқытты. Осы ұстазымның арқасында биік белестерді бағындырдым деп айта аламын,

дейді кәсіпкер.

Ал Қазақстанда ұстаздар бір гүл шоғына жарымай отыр. Себебі мұғалімнің мерейін асырамын деп айыппұл арқалауың мүмкін.