Ескі Қазақстанда халық қиналып жүр. Айта берсең проблема шаш етектен. Мұнай мен газдың үстінде отырған елміз, үш мұнай өңдеу зауытымыз бар. Қалайша жанар-жағар май дефицитіне тап болдық? Сағаттары қысқарған мұғалімдердің мәселесі бар. Қант тапшылығы неше ай болды әлі реттелген жоқ. Құрылыс жұмыстары қаржы тапшылығынан толық жүргізілмей келеді. Осыларды жүйелі шешуге бағытталған жобалар да көрінбейді. Ескі жүйеде жұмыс жасап үйренген шенеуніктер жаңа жағдайға бейімделе алмай жүрсе керек. Яғни, биліктің барлық тармағына жаңа, таза адамдар келу керек еді. Тек мемлекет мүддесін ойлайтын. Ондай азаматтар 19 млн халық ішінен табылады, деп жазған еді мәжіліс депутаты Еділ Жаңбыршин.

Елдің қамын ойлайтын, халықтың назы мен сынына құлақ асатын жаңа кадрлар табылғаны ма?

Белгілі журналист және кәсіпкер Бейбіт Әлібеков өзінің Телеграм парақшасында жаңа саяси партия құратынын жариялады. Бұл ұйымға кәсіпкер Максим Барышев, ресторатор Қуаныш Шонбай, өзін-өзі қамтамасыз ете білген бірқатар жастар кірмек. «Республика» партиясы әлі күнге дейін экономиканы «жаулап» отырған олигархтарды, биліктегі популистерді ысыратын ойлары барын жеткізді.

Партия алдағы парламент сайлауы қарсаңында құрылды. Тіркелмеді. Оған әжептеуір уақыт керек. Дегенмен қазақтың бюрократиясымен бетпе-бет кездесуге еті үйрен кәсіпкерлер заңды рәсімдерді еңсере алатыны сөзсіз. Партияның бағдарламасын кәсіби мамандар дайындап жатыр екен. Жас буынның сұранысына сай болады дейді. Яғни еуропалық білім деңгейі мен тұрмыс-тіршілігіне ұмтылатын халықтың қалауын орындай алатын партия 5 пайыз дауыс жинай алса болғаны.

Жаңа партия құрушылар президент әкімшілігінің ойын түсінетіндердің бірі болды. Демек, конструктивті оппозиция ретінде әрекет ете алатын оңшыл-орталық күштің пайда болғаны. Ескі Қазақстанның әдетінен арылып, Тоқаев ұстанатын дұрыс бағытпен жүруді дұрыс көріп отыр.

Жаңа конституция бойынша референдум басқаша дәуірдің бастау нүктесін заңды түрде рәсімдеп берді. Еліміз өз дамуына алғашқы қадамын жасап отыр. Биылғы қаңтар оқиғасы бұрынғы жолмен өмір сүруге болмайтынын анық көрсетті. Оған баршамыз кәу болдық. Енді жаңа партия Қазақстандағы реформаларды жүзеге асыру ісіне белсенді ат салысады. Бұрын өте алшақ болған кәсіпкерлер ел саясатына қатысты істе сырт қалуға болмайды дейді.

Не үшін? Әуелі, билікке популистер мен «Ескі Қазақстанның» реваншистері қайта келмеуі үшін,

деді Бейбіт Әлібеков.

Ал ескі элитаның белсенділері нағыз демократиялық мемлекет құруды қолға алған жаңа саяси күштің пайда болуын менсінбей отыр. Олар партия құрғысы келетіндердің жоспарына күмәнмен қарайды. Оған себеп жоқ емес. Мұндай елеулі реформа жасаймыз дегендер көп болған. Уәделері құрғақ сөз болып жарты жолда қалып қойғандары да дар. Осыған қарап ескі мәселелердің жаңа шешімдері табылмай қалар ма екен деген үрей сол.

«Паризиттерді» құрту керек, әйтпесе қоғамда үлкен «эпидемия» болады—

деген депутат Жаңбыршинның сөзінен кейін, расымен бұны жаңа кезеңге алғашқы қадамның жасалғаны деп қабылдайық.