Қазақстанда қызылша дертінің өршуіне байланысты Солтүстік Қазақстан облыстық перинаталдық орталығында босанатын әйелдің жанынан серіктес болып кіруге уақытша тыйым салынды.

Бұған дейін әлеуметтік желіде СҚО перинаталдық орталығында қызметкерлердің бірі қызылшамен ауырып қалғаны туралы ақпарат шыққан еді. Қызылша жаңа туған нәрестенің өмірі үшін аса қауіпті, бұл жұқпалы ауру өлімгедейін жеткізеді, деп хабарлайды El.kz ақпарат агенттігі Kazinform ХАА сілтеме жасап.

Облыстық денсаулық сақтау басқармасы баспасөз қызметі медицина қызметкерінің расымен дертке шалдыққанын, бірақ ауруды жұқтырған қызметкер ол кезде баласымен бірге науқастануына байланысты демалыста болғанын мәлімдеді.

Науқас қызметкер емдеу мекемесінде емделушілермен байланыста болмаған. Облыстық перинаталдық орталықта қызылша инфекциясы тіркелмеген. Перинаталдық орталықта карантин енгізілген жоқ, бірақ серіктестік босануға тыйым салынды. Мұндай шешім көбісі вакцинация паспортын ұсынбағанына әрі қызылшамен ауырғанын растай алмағанына байланысты қабылданған.

Қызылшаның инкубациялық кезеңі ұзаққа созылады, келушілердің бірі ауруды жұқтырушы болуы мүмкін.

Бұл науқастар мен жаңа туған нәрестелердің денсаулығына қауіп төнбеуі үшін қабылданған шешім.