Депутат Ардақ Назаров Мәжіліс отырысында идеология мәселесіне назар аударып, елімізде ЛГБТ насихаты өршіп тұрғанын көтерді. Айтуынша, 8 сәуірде Астанада феминистер шеру өткізіп, тұрмыстық зорлық-зомбылыққа қарсы митингтің арты әйел теңдігін қолдаудан бастап, гомосексуализмді насихаттаумен аяқталды.

Өрімдей балалар, арасында оқушылар да бар, ЛГБТ жалауын жамылып жүр,

дейді депутат.

Назаров соңғы кезде ақпараттық кеңістіктерде біржыныстық неке, гомосексуализм, жынысты ауыстыру секілді мәселелер еркін насихатталып жатқанын айтады. 

Ең сорақысы, гей-пропоганда қазір Астана мен Алматы секілді ірі қалалардың жекеменшік мектептерінде де өте қарқынды насихатталып жатыр. Мұны сондағы оқушылардың әлеуметтік желідегі парақшаларынан ашық аңғаруға болады. «Ауру батпандап кіріп, мысқалдап шығады» дейді атам қазақ. Өкінішке қарай, біз сол ауруды қоғамға жұқтырып алдық. Бұл бәлкім, идеологияның әлсіздігінен шығар. Енді қанымызға сіңіп кетпей тұрғанда дереу алдын алу шараларын қолға алу қажет,

деп есептейді Назаров.

Назаров қоғам белсенділері «толеранттық», «төзімділік» деген сөздерді қалқан етіп, әлеуметтік желілерде ЛГБТ өкілдеріне қарсы шыққандарды қаралайтынын айтады. Алайда оның бұған жауабы дайын:

Осындай азаматтарға айтарым: ертең сіздің ұлыңыз келіннің орнына еңгезердей қызтекені үйге ертіп келсе, немесе аялап өсірген қызыңыз еркекшорамен «отау құрып» жатса, толерантты болып батаңызды бересіз бе? Мұндай азғындық өз отбасыңызға келсе төзесіз бе?,

дейді Ардақ Назаров.

Депутат митингке келген балалардың ата-аналарынан сұрау алынуын, барлық платформада, соның ішінде әлеуметтік желілерде ұлттық мәдениетке сәйкес келмейтін фильмдер мен сериалдарды көрсетуге және насихаттауға тыйым салынуын, теріс ағымдарды насихаттайтын ақпарат көздерінен сақтайтын заң нормалары жасақталып, Парламентке қарастыруға енгізілуін, республика көлеміндегі оқу орындарында ұлттық құндылықтарды, мәдениетті насихаттау сабақтары оқытылуын сұрады.