ВАК астық пен ұнды экспорттауға шектеулерді алып, мал экспорттауға квоталар белгілеуге шешім шығарды. Бұл туралы Премьер-министрдің баспасөз қызметі хабарлады.

Ауыл шаруашылығы министрлігі мәліметінше, биыл елімізде 13 млн тоннадан астам бидай жинау жоспарланған. Бұл былтырғы көрсеткішпен салыстырғанда 12%-ке артық. Ел ішінде бидай тұтыну үшін шамамен 6,5 млн тонна қажет.

Мүдделі мемлекеттік органдардың, «Атамекен» ҚР ҰКП, Астық одағы, Астық өңдеушілер одағы өкілдерімен, «Шопан-Ата» ұлттық агро-қозғалысының басшысымен бидай мен меслинді, бидай ұнын экспорттауға сандық шектеулерді (квоталарды) алып тастаудың орындылығын жан-жақты талқылау қорытындысы бойынша, сондай-ақ АШМ болжамы негізінде астық пен ұн экспорттауға шектеулерді 2022 жылдың 10 қыркүйегінен бастап алып тастау туралы шешім қабылданды. Еске сала кетейік, бұл шектеу Ауыл шаруашылығы министрлігінің бұйрығымен 2022 жылғы 8 шілде мен 30 қыркүйек аралығына енгізілген еді,

деп айтылды Сыртқы сауда саясаты және халықаралық экономикалық ұйымдарға қатысу мәселелері жөніндегі ведомствоаралық комиссияның (ВАК) кезекті отырысы

Ауыл шаруашылығы министрлігіне астық экспортына мониторинг жүргізу және астық пен ұн экспортын одан әрі реттеу мәселесін пысықтау тапсырылды.

Отырыста аналық мал басын қоспағанда, ірі қара және ұсақ қара малды экспорттауға цифрлық шектеу (квоталар) белгілеу мақұлданды. 

Статистикаға сүйенсек, 2022 жылғы 1 тамыздағы жағдай бойынша, еліміздегі ірі қара мал саны – 9,4 млн бас, оның ішінде 4,5 млн басы — сиыр, 3,2 млн басы — төл бар.

Қошқар экспорттауға 60 мың бас немесе жалпы мал басының 9%-і, сондай-ақ 120 мың бас тоқты немесе жалпы мал басының 10%-і көлемінде квота белгілеу туралы шешім қабылданды.

Еске салайық, 2022 жылғы 21 қаңтар мен 21 шілде аралығында ірі қара және ұсақ малды экспорттауға тыйым салынған еді.