Тазы мен төбетті сақтау және қалпына келтіру туралы жеке заң әзірленеді. Бұл туралы Президент әкімшілігінің баспасөз қызметі хабарлады.

Президенттің іс басқарушысы Айбек Дәдебаев қазақы ит тұқымдары тазы мен төбетті сақтау және қалпына келтіру мәселелері бойынша жиын өткізді.

Мамандармен (кинологтар, ғалымдар) талқылау нәтижесінде тазы мен төбетті сақтау және қалпына келтіру мәселелеріне қатысты жеке заң жобасын әзірлеу жөнінде шешім қабылданды.

Осыған орай, жиында Экология, геология және табиғи ресурстар министрлігіне басқа мүдделі мемлекеттік органдармен бірлесе отырып заң жобасының соңғы нұсқасын енгізу тапсырылды,

делінген хабарламада.

Сонымен қатар Экология, геология және табиғи ресурстар министрлігі Ауыл шаруашылығы министрлігімен және сарапшылармен бірлесіп қазақы ит тұқымдары стандартының жаңа жобасын қарастыратын болды.

Алда атқарылатын іс аз емес. Ведомствоаралық жұмыс тобының барлық шешімдері сарапшылармен бірге талқыланып, олардың пікірі ескерілуге тиіс. Кезінде панажайы бар кинологиялық зерттеу орталығын салу тапсырылған еді, ол орта жолдан тоқтап қалды. Енді мұны соңына дейін жеткізу керек. Сонымен қатар, тазы мен төбетті Халықаралық кинологиялық қауымдастықта (FCI) тіркетіп, олардың шыққан жері ретінде Қазақстанды көрсету рәсімдерін ерекше бақылауға алу қажет,

деді президенттің іс басқарушысы Айбек Дәдебаев.