Жыл сайын Ұлттық тестілеу ортылығы ҰБТ сұрақтарына өзгеріс енгізіп отырады. Енді ҰБТ-да дұрыс жауапты табу жеңілдейді. Бұл туралы Ұлттық тестілеу орталығы басшысы Руслан Емелбаев мәлімдеді.

Руслан Емелбаев түлектердің және эксперттердің пікірін ескере отырып қазақстан тарихы және оқу сауаттылығы пәндері бойынша өзгеріс еніп, дұрыс жауап саны азаятынын айтты.

Келесі ҰБТ-дан бастап талапкерлердің білімін терең бағалау мақсатында қазақстан тарихы пәнінің бір нұсқасында 20 тест тапсырмасы (20 балл) болады: 1-ден 10-ға дейін – бір дұрыс жауапты таңдауға арналған тест тапсырмалары, 11-ден 20-ға дейін – контекстке негізделген тапсырмалар (5 сұрақтан 2 контекстік мәтін). Ал оқу сауаттылығы тест тапсырмаларының саны мен формасы да өзгеріске ұшырайды. Енді талапкерлерге 3 мәтін бойынша 15 тест сұрағы (15 балл) беріледі,

деп жазды ол Instagram-парақшасында.

Орталық басшысы ҰБТ тапсырмаларының құрылымы да өзгергенін айтты. Нәтижесінде мынадай шешім қабылданды:

• бір дұрыс жауабы бар тест тапсырмаларында нұсқалар саны 5-тен 4-ке дейін;
• бір немесе бірнеше дұрыс жауабы бар тест тапсырмаларында (үш дұрыс жауаптан көп емес) нұсқалар саны 8-ден 6-ға дейін азайтылады.

Руслан Емелбаев бұл шешім талапкерлерді бағалаудың объективтілігін арттырады, нақты статистикалық талдау жүргізуге мүмкіндік береді деп сенеді.