Ақша жоқ деп жылаймыз, мемлекет көмек көрсетпейді деп шағымданамыз, қарызға батып жатсақ та, тамақ ішуге ақша табамыз. Қазақстандықтар күзден бастап үйден тамақ ішуді азайтыпты.

Мейрамханаға барып, мәзірден тәбеті тартқан тағамды таңдап ішетіндер осылай мақтанып жүр. Тіпті өткен айда отандастарымыз 100 миллиард теңгесін қоғамдық тамақтану орындарына жұмсаған. Оттан қазанды түсірмеуші едік. Әйелдер үйде ас әзірлеуді қиынсынып бара ма, әлде отағасына еріп, бөрінің азығы жолда деп жүр ма? Астана телеарнасы арнайы сюжет шығарыпты.

Ет дегенде бет бар ма? Мейрамхана мәзірінде де керектінің бәрі бар. Ақысын төлеп, асқазанға сәлем жолдайсыз. Үйден емес түзден тамақтануға бейімделіп алдық.

Жан басына шаққанда отандастарымыз күніне 2100 теңге жұмсайды.

Қалтаны қағады. Көпшілік оны біледі. Біле тұра бас тартар емес. Түскі асқа түсіністікпен қарайсың. Жұмыста болады, әріптестерімен ауқаттанады. Кешкілік отбасымен үйде емес, сыртта тамақтанады. Ас әзірлеу, орнын жинау секілді артық жұмысқа бас қатырғысы келмейтіндер көбейгендей.

Мереке, демалыс күндерді былай қойғанда апта ішінде мейрамханалардан бос орын таппайсың. Жұрттың бәрі үйде отырмай ма деген ойда қаласың.

Қазақстандықтардың қыркүйек айында қоғамдық тамақтану орындарына 100 миллиард теңге қаржы жұмсады. Қомақты қаржы. Бірақ жан басына шаққанда 2 мың теңге шамасында. Сондықтан рестораторлар пайдаға кенеліп отырған жоқпыз дейді.

Бұл статистика рас болса, рестораторлар елдегі ең бай адам болуы керек. Бірақ, олай емес. Елдегі қымбатшылықты ұмытпаған жөн. Қазір адамдардың ойы бұрынғыдай емес. Мейрамханаға барып, 30-35 мың теңге төлегенше сол ақшаға үйіне азық-түлік сатып алуды құп көреді.

Гүлнар Катибаева, рестораторлар қауымдастығының басшысы

Тамақтану орындарына жұмсалған қаржының көбеюі бағаның қымбаттауына байланысты болуы мүмкін. Былтырдан бері мейрамханадағы ас-ауқат Жетісу облысында 44, Шымкентте 40, ал Елордада 38 пайызға өскен.