Елдегі сот органдарының хабарлауынша, 23 жастағы Маджидреза Рахнавард дүйсенбіде таңертең Мешхед қаласында көпшілік алдында дарға асылды.

Жас жігітке «Құдайға қарсы шықты» деген кінә тағылып, екі қауіпсіздік қызметкерін өлтірді және тағы төрт адамды жарақаттады деген айып тағылды, ол мойындады.

17 қарашада бүлікшілер тобы дүкендерді жабу үшін олардың иелеріне қоқан-лоққы көрсетті,

деп мәлімдеді Мешхед мэрі.

Бұл – Иранның бір аптадағы екінші өлім жазасы. Біріншісі өткен бейсенбіде өтті және әлемнің көптеген елі бұл әрекетті құптамады. 23 жастағы Мохсен Шекариге де дәл осындай айып тағылды, ол да Тегерандағы Басидж мүшесіне шабуыл жасады деп айыпталды.

Баспасөз сұрақтарына жауап бере отырып, Иран сыртқы істер министрлігінің өкілі болған оқиға ішкі іс екенін айтты.

Оның айтуынша, халықтың демонстрацияларға толық құқығы бар, бірақ бұл наразылық білдіруші емес, бүлікші болды.

Өлім жазасы халықаралық қоғамдастықтың сынына алып келді, ол өз кезегінде Иранға қарсы санкцияларды күшейтуі мүмкін.

Мен Иранның Сыртқы істер министрімен ұзақ сөйлестім. Біз өлім жазасы туралы тілдестік. Мен Еуропалық одақтың бұл мәселеге қатысты алаңдаушылық білдіріп отырғанын және мұны құптамайтынын, сондай-ақ санкциялар туралы хабарладым,

деді Еуропалық дипломатияның басшысы Джозеп Боррель.

HRANA құқық қорғау тобының мәліметіне сай, 11 желтоқсандағы жағдай бойынша Иранда 488 наразылық білдіруші, оның ішінде 68 кәмелетке толмаған, сондай-ақ қауіпсіздік күштерінің 62 қызметкері қаза тапты.18 259 демонстрант қамауға алынды.

Наразылық толқыны қайдан шықты?

Иран қоғамындағы наразылық түтіні баяғыда түтенген. Алайда бұрын-соңды болмаған шерулердің өршуіне 22 жастағы қыздың өлімі себепші болды. Ол хиджабты дұрыс кимегені үшін полиция қызметкерлері тарапынан соққыға жығылып, ауруханада көз жұмды.

Аталған оқиғадан кейін Иран әйелдері мен қыздары ашық түрде хиджабтарын өртеп, шаштарын қиып тастады. Бұл әрекеттерін камераға түсіріп, бүкіл әлемнің назарын аударды. Артынша Сирия мен Францияның әйелдері де олардың әрекеттерін қайталай бастады. Тіпті хиджабты өз еркімен киетіндері де Иран билігінің әрекетіне қарсылық білдірді.

Хиджаб – бет пен денені толық жауып тұратын матадан тігілген киім. Ол 1979 жылы Ислам революциясы жеңіске жеткен соң Ирандағы әйелдер үшін міндетті болды. Оны көшеде дұрыс кимей жүргендер заңға қарсы шықты деп айыпталып, қамауға алынуы мүмкін. Тіпті осы жағдайда соққының астында қалатындары да бар.