Америкалық актер Леонардо Ди Каприо Instagram желісіндегі парақшасында жойылып бара жатқан киіктерді сақтауда табысты еңбегі үшін Қазақстан үкіметін құттықтады.

2002 жылы әлемде бұл сүтқоректілерге жойылып кету қаупі төнген еді. 2005 жылы Қазақстанда олардың саны небәрі 48 мың болса, қазір олардың саны 1,9 миллионға дейін өсті.

Бұл бұрын-соңды болмаған жағдай. Браконьерлермен күресуде, қорғалатын жаңа табиғи аумақтарды құрудағы еңбегі мен құқық қорғау органдарына үлкен күш жұмсағаны үшін Қазақстан үкіметін құттықтаймын. Бұл Қазақстаның табиғатты қорғау ұйымдарымен, университеттермен және ғалымдармен ынтымақтастық жасап, бірлескен күш-жігеріне негізделген табиғатты қорғау саласындағы табыстың жарқын мысалы,

деп жазды актер.

Леонардо Ди Каприо жылдар бойы қоршаған ортаға жанашырлар қатарында. Әсіресе, жойылып бара жатқан жануарларды қорғауда өз үлесін қосып келеді. Оның “Ди Каприо» қоры әлемнің 40 еліндегі ондаған экологиялық жобаларға 30 миллион доллардан астам қаржы бөлген.

Айта кету керек, Қазақстан билігі биыл киіктерді атуға рұқсат берген болатын. Соңғы санақ бойынша еліміздегі ақбөкен саны 2 миллионға жетіп жығылған. Әсіресе батыс аймақтардағы шаруалардың егістігін отап, берекесін алғаннан кейін президент жауапты ведомстваға тиісті шешім шығаруды тапсырған-ды. Одан бері салаға жауапты министр екі рет ауысып үлгерді. Экология министрлігі шетелден ғалымдар алдырып, талқылаймыз дегенше, биыл облыс шаруаларына киіктен келген залал 8 миллиард теңгеге жуықтаған. Ақбөкендер 1 миллион 284 мың гектар жайылым-шабындықты таптап, 5 мың гектар егінді отап кетіпті. Қазір тиісті есеп-қисап Үкіметке жіберілген.