Отынға қатысты барлық мәселе Шымкент зауыты жөндеуден шыққанда шешіледі.

Өңірдегі жүргізушілер бірнеше күннен бері бекеттерді аралап, жанармай таппай сабылып жүр, дейді kolesa.kz. Түркістан облысында көгілдір отын тек талонмен беріліп жатыр деп хабарлады Otyrar.kz. Ал кей бекеттер 1000 теңгеге шектеу қойған (5 литрден артық бермейді).

Газ бен дизель мүлде жоқ. Болған күннің өзінде лимиті бар. Шымкент пен Түркістан облыстарында тапшылық байқалады, 

дейді жүргізушілер.

Жергілікті шенділер наурызда Шымкент мұнай өңдеу зауыты мен Ақтөбедегі зауыт 10 мың тоннадан астам жанармай әкелу керек болғанын алға тартты. Бірақ Ақтөбеден жеткізу кезінде қиындық болып, Шымкент зауыты жөндеуге жабылған.

«Осы айдың ортасында мұнай өңдейтін зауыт өз жұмысын бастайды, сол кезде газ тапшылығы толық шешіледі. Министрліктің бұйрығы бойынша сәуірде CNPC 2 мың тонна газ жеткізеді, қалғанын „Петро Қазақстан“ береді. Осылайша өңірдегі дизель мәселесіне нүкте қойылады» — деді әкімдік өкілдері.

Ендігі, жүргізушілер дизель мен газды 12 сәуірден кейін Энергетика министрлігі мен Бәсекелестікті қорғау және дамыту агенттігі бекітетін жоғарғы бағамен сатып алуға мәжбүр.

Билік басындағылар дизельдің жаңа бағасын айтқаны сол екен, оңтүстікте жағдай одан сайын ушықты. Шымкенттегі зауыттың жөндеу жұмысы Жамбыл мен Алматы облысындағы шиеленіске әкелді десек, бағаның қымбаттауы жығылғанға жұдырық болды. Оңтүстік астанамыздың бекеттерінде де жанармай тапшы.