Tiktok желісінде Бексұлтан Молтаевтың курьер болып жұмыс істеп жүрген видеосы жұртшылықты тамсандырған еді.

Желіні тамсандырған курьердің тірек-қимыл жүйесі бұзылғанын аңғаруға болады.

Күні кеше Bake_bloger деген азамат Бексұлтанға мопед сыйлады.

Барша қазақ елі сенің видеоңды көріп тамсанды. Біз одан қатты күш-жігер алдық. Нағыз ер азаматтың жұмысқа бейім екенін, жұмыс жоқ деген жай сылтау екенін сен дәлелдеп бердің. Алланың берген сынағына мойымай, адал еңбек етіп жүргенің сүйсінтті. Мен қазір қолымнан келгенше саған көмектесемін. Өзімнің ер-азаматтық парызымды орындаймын,

деді блогер.

Ол өзінен көп адам көмек сұрайтынын да айтты.

Менен көп адам «көмектесіңізші» деп көмек сұрайды. Бірақ он екі мүшесі сау. Ал сен өзіңдегі сынаққа мойымай, жұмыстан қалмай жүрсің,

деп ол мопедтің кілтін табыстады.

Айта кетейік, әлеуметтік желіде пайда болған видео бірнеше күнде 2 миллионға жуық қаралым жинады. Денсаулығындағы қиындықтарға қарамастан, Алматы көшелерінің бірінде жас жігіт курьер болып жұмыс істеп жүргенін көруге болады.

Жұртты тамсандырған видеоның кейіпкері 25 жаста, Тараз қаласының тумасы. Ағасының ауыр диагнозын естігеннен соң бірден Алматыға көшіп келген екен. Ал анасы мен егіз әпкесі Таразда қалған.

Еңбеккор жігіттің негізгі жұмысы бар екен. Супермаркетте жүк тиеуші болып қызмет етеді. Ағасының еміне қаражат жетіспегендіктен, жеткізуші болып орналасыпты.