Жаңаөзендегі дүрбелең және оның сауатты ұйымдастырылуы — осының режиссері кім деген сұраққа жетелейді. Себебі, жұмысшылардың штатқа алу бойынша заңды талабын енді саяси бағытқа бұрмалау әрекеттері басталды. Астанаға барған топ келісімге келсе де, «Өзенмұнайгазға» қарасты БЖБ мекемесінің жұмысшылары наразылық акцияларын жалғастырып, үлкен компанияның жұмысын тұралатып отыр, деп жазады Dala Inside.

Бұл топтың лидері – Мұратбай Жұмағали. Ол жақында өткен сайлауда Мәжіліске өте алмай қалған өкпелі мұнайшы. Мұратбай Жұмағали бастаған топ бүкіл «Өзенмұнайгаз» компаниясын тоқтатуды талап етуге көшті. Ал 150 мың халқы бар қала тұрғындары «Өзенмұнайгаз» компаниясына қарап отыр.

БЖБ мекемесінде наурыз айында бұрғылаушы (5 разряд) – 1 374 781 теңге, құбыр таситын көлікті жүргізуші (5 разряд) – 1 161 478  теңге, жерасты скважина операторы – (4 разряд) 1 228 526 теңге айлықты таза қолына алған. Ондай жұмыстан бас тартып, тоқтату үшін жұмысшыларға үлкен себеп керек.

Құзырлы органдарға Мұратбай Жұмағалиді бақылауға алу, жан-жақты байланысын тексеру аса маңызды. Сырттан ешкім арандатып отырған жоқ па деген сұрақ туындайды.