Вайнер Мейржан Төребаевтың әйелі, кәсіпкер Дана Есеева Михаил Козачков ұсталғаннан кейін журналистерге көкейінде жүрген сұрақтарды қойды. Айтуынша, журналистер мен қоғамдық құқық қорғау ұйымдары әділетсіз әрекет етуде.

Михаил Козачков ұсталғаннан кейін журналистер мен құқық қорғау ұйымдары кінәсіздік презумпциясы туралы айта бастады. Менің бір сұрағым бар: қоғамдық резонанс туғаннан кейін Мейіржанды ұстаған кезде сіздер қайда болыңыздар? Сіздер Михаил Козачковтың Телеграм арнасындағы айыптаулар негізінде ақпарат алып, өз парақшаларыңызда, сайттарыңызда жарияладыңыздар. Бәрің сол кезде кінәсіздік презумпциясы туралы ұмытып кеттіңіздер,

деп налыды Дана Есеева.

Дананың есептеуі бойынша Михаил Козачков өз Телеграм арнасында Мейіржанды айыптап 22 пост жазған. Мейіржан бұл істе жәбірленуші болған кезде де, бірде-бір дәлелі болмаса да «Неге ол СИЗО-да емес?», «Неге оны отырғызбай жатыр?», «Неге ол әлі бостандықта жүр?» деп қоғамдық резонанс тудыруға тырысқан.

Тіпті квалификация туралы қаулыны бәрімізден бұрын Михаил Козачков өз Телеграм арнасында жариялаған. Оны тіпті оның адвокаты да көрмеген еді. Ол құжат бізден бұрын оған қалай түсті? Және тергеу кезінде мұндай құжатты жариялауға болмайды ғой,

дейді Дана Есеева.

Сондай-ақ, ол әділдік іздеп шырылдап жүргенде Михаил Козачков Дана Есеева туралы да түрлі қаралайтын видеолар жариялаған. Осыған байланысты оның құқық қорғау ұйымдарына сұрағы барын айтты:

Мен табалап қуанып тұрғаным жоқ, бірақ құқық қорғау ұйымдарына сұрағым бар. Неге Қазақстан Республикасының бір азаматына қатысты сіздер кінәсіздік презумпциясы туралы естеріңізге аласыздар да, ал екіншісіне келгенде ұмытып кетесіздер? Одан қалды еш дәлелсіз Мейіржан қаржы пирамидасын құрды, ҰҚТ мүшесі деген жалған ақпаратты таратасыздар? Неге бұлай бөлесіздер? Қазақстан Республикасының азаматтары бәрі заң алдында тең емес пе еді? Мен жай ғана әділдік орнағанын қалаймын.