Мәжіліс депутаттары мектептерде қаржы сауатын оқытуды ұсынды. Ал Қаржы министрі Ерұлан Жамаубаев ұсынысты қолдап, бұл мәселені білім министрліктерінің басшыларымен бірлесіп шешуге уәде берді.

Депутат Бауыржан Сартбаевтың айтуынша, халық банкроттық жағдайда жетпес үшін оларға мектептен қаржы сауатына үйрету қажет.

Қаржы сауатын мектептен бастап оқыту керек. Оқу-ағарту министрлігі осы мәселені пысықтап, мектеп бағдарламасына қаржы сауатын енгізу мүмкіндігін қарастыруы керек. Өйткені адам несиесін өтей алмайтын жағдайға жеткенде және банкротқа ұшыраса, оған ақшаны дұрыс пайдалануды үйрету тым кеш болады,

деді депутат.

Қаржы министрі Ерұлан Жамаубаев депутаттың ұсынысын қолдап, Оқу-ағарту және Білім-ғылым министрімен бірге талқылауға дайын екенін жеткізді.

Қаржы сауаты біздің қоғам алдында тұрған үлкен мәселе деп есептеймін. Қаржылай сауатсыз болудың кесірінен көбі қиын жағдайға тап болады. Мен қолдаймын және бұл мәселені екі министрмен көтеруге дайынмын,

деді қаржы министрі.