Кипрдің Лимасол қаласында өткен концертінде Ресей әншісі Земфира Украинадағы соғысқа қарсы ойын білдірді, деп жазды Азаттық радиосы.

Залдағы тыңдаушылардың бірі жазып алған Земфира сөзінің видеосы жексенбінің кешінде «ЧТД» телеграм-арнасында пайда болған.

Бүгін соғыстың басталғаны 228 күн болды, 228 күн тозақ. Осы уақытта көп ойландым. Сахнада сөйлегенді ұнатпаймын, сөйлей де алмаймын, бірақ менің елім осы соғысты тоқтатса екен деп күнде құдайдан тілеймін,

деді әнші.

Осы сөзінен соң әнші «Атпаңдар» деген әнін салған.

Земфира Лимасолдан кейін Тель-Авив, Стамбул, Вена, Прага, Оффенбах-ам-Майн, Гамбург, Берлин, Париж және Гаага қалаларында концерт өткізеді. Турне 3 қарашада Лондонның Royal Albert Hall концерт залында аяқталады.

Биыл ақпанда Ресей Украинаға басып кірген соң Ресейдің көптеген белгілі музыкантттары соғысқа қарсылығын білдірген. Осыған байланысты олардың Ресейдегі концерттеріне тыйым салынған. Музыканттардың кейбірі Ресейден кетіп қалса, кейбірі қысымға ұшыраған. Ресей билігі рэпер Оксимиронды «шетел агенті» десе, әнші Юрий Шевчукке Ресей әскеріне тіл тигізгені үшін 50 мың рубль айыппұл салған.

Маусым айынан бастап Ресейдің концерт агенттіктері «сахнада соғысқа қарсы сөз айтпау» туралы әншілермен келісім жасаса бастаған. Әртістерге Украинаның мемлекеттік символдарын пайдалануға тыйым салған.