Америкалық фрамацевтикалық компания олардың жаңа дәрісі коронавируспен күресуге тиімді екенін мәлімдеді. Дегенмен Қазақстан оны сатып алмай отыр. Мұның себебін Денсаулық сақтау вице-министрі айтып берді.

Коронавируспен әлем болып әлі күресіп жатырмыз. Қазір елдер вируспен күрестің және оны емдеудің түрлі әдісін қолданып жатыр. Солардың бірі — сертификатталған дәрі препараттары. Мысалы, 2021 жылы көктемде Pfizer компаниясы адамдарға «Паксловид» дәрісін беріп, сынақ өткізе бастады. Компания препарат жақсы нәтиже көрсеткенін хабарлаған еді. АҚШ-тың Азық-түлік және дәрі-дәрмек басқармасы дәріні мақұлдап, қолдануға рұқсат етті.

Дегенмен Қазақстан дәріні сатып алуға асықпай отыр. Оның себебін Денсаулық сақтау вице-министрі Айжан Есмағамбетова орталық коммуникациялар қызметі брифингісінде айтып берді.

Қазір біздің клиникалық хаттама әзірлеушілеріміз осы бағытта белсенді жұмыс істеп жатыр. Біз коронавирусты емдеуге қолданылатын бірқатар дәріні зерттеп жатырмыз. Бірақ олардың бәрі зерттеудің соңғы кезеңінен өте алмады. Бірқатар ел қазіргі жағдайда осы препараттарды шұғыл қолдануды ұсынды. Барлық материалды зерттегеннен кейін нәтижесін хабарлаймыз,

деді Айжан Есмағамбетова.

Нәтиже бір ай ішінде дайын болуы мүмкін.