Қасым-Жомарт Тоқаев жолдауында бюджет саясатына реформа жасалатынын айтты.

Мемлекет басшысы көрпеге қарай көсілу қажет екенін ұмытпауды ескертті. Ақырғы нәтижені дөп басуы керек екенін айтты.

Енді бюджет кодексінде шекті нормативтер бекітіледі. Оны бюджетті жоспарлау және орындау кезінде міндетті түрде ұстану қажет екені айтылды.

Ұлттық қордың қаржысын тиімсіз жұмсау тоқтатылады. Бұл — өте өзекті мәселе. Қордың қаражатын аса қажет инфрақұрылымды дамытуға және еліміз үшін маңызы зор жобаларды қаржыландыруға жұмсаймыз,

деді Қасым-Жомарт Тоқаев.

Президент бюджет процестерін барынша жеңілдету қажет екенін айтты. Мемлекеттік органдарға игерілмеген қаражатты келер жылға қалдыруға мүмкіндік беру керек. Сол арқылы олар ақшаны бюджетке қайтарудың тиімсіз тәртібінен құтылатыны айтылды.

Сонымен бірге, бюджетке қатысты қауіптерді басқару жүйесін іске қосу керек. Бұл жүйе квазимемлекеттік секторды да қамтуға тиіс. Біз салық түсімін өңірлердің өзіне бере бастадық. Бұл жұмысты жалғастыру қажет,

деді президент.

Мемлекет басшысының айтуынша, халық қатысатын бюджет жобасы тиімді іске асырылып жатыр. Оның ауқымын кеңейтіп, жобаға маңызы бар қалалар мен ауылдарды тарту керек екені айтылды.

Тұрғын үй коммуналдық шаруашылығы қаржысының кемінде 10%-і қайда жұмсалатынын қоғамның өзі айқындауға тиіс. Осы айтылған мәселелерді тиімді жүзеге асыру үшін жаңа бюджет кодексін қабылдау қажет,

деді Қасым-Жомарт Тоқаев.