Орталық сайлау комиссиясы 7 қазанда екі заңды тұлға қоғамдық пікірге сұрау салғанын хабарлады. Осы орайда комиссия қоғамдық пікірге кім сұрау сала алатынын жариялады.

Орталық сайлау комиссиясы қоғамдық пікірге Қазақстан Республикасының заңнамасы бойынша тіркелген заңды тұлға сұрау сала алатынын жазды.

Қазақстан Республикасының заңнамасына сәйкес тіркелген, қоғамдық пікірге сауал салуды жүргізу бойынша кемінде 5 жыл тәжірибесі бар заңды тұлғалар тиісті құжаттардың көшірмесін қоса беріп, бұл туралы Орталық сайлау комиссиясын жазбаша түрде алдын ала хабардар ете отырып жүргізуге құқылы,

делінген хабарламада.

Орталық сайлау комиссиясына жіберілетін хабарламада сұрау салуды жүргізуге қатысатын және осы салада жұмыс тәжірибесі бар мамандар туралы, қоғамдық пікірге сауал салу жүргізілетін өңірлер жайлы, қолданылатын талдау әдістері туралы мәліметтер көрсетіледі.

Сондай-ақ, қоғамдық пікірге сұрау салу нәтижесiн, сайлау, сайлауға байланысты өзге де зерттеулер, кандидаттарды не саяси партияларды қолдап дауыс беру нәтижелерiнiң болжамын дауыс берiлетін күннің алдындағы 5 күн ішінде және дауыс берiлетiн күні интернет желісінде жариялауға жол берілмейтініне назар аударамыз (Конституциялық заңның 28-бабының 9-тармағы),

делінген комиссия таратқан хабарламада.

Заңның бұл талабы сайлау науқанын дайындау және өткізу кезеңінде болатын қоғамдық пікірге сауал жүргізудің барлық түріне қолданылады.

Бүгін «Қоғамдық пікір» институты мен «AMANAT» партиясының «Қоғамдық саясат институты» жеке меншік мекемесі қоғамдық пікірге сұрау салған. Заңды тұлғалардан түскен хабарлар комиссия сайтында жарияланып отырады.