Саясаттанушы Данияр Әшімбаев өсім көптеген салаға қосымша қысым жасап, халықтың шамадан тыс көбею қаупін тудырады деп есептейді.

Бір күн бұрын Адам ресурстарын дамыту орталығы эксперттері оңтүстік облыстар мен Маңғыстауда туу көрсеткішінің жоғары екеніне байланысты болжам жасады. Олар 2050 жылға қарай Қазақстан халқының саны 27,7 миллион адамға дейін артуы мүмкін екенін хабарлады. Ал Шығыс Қазақстан, Қостанай, Солтүстік Қазақстан, Қарағанды, Павлодар және Ақмола облыстарында халық саны одан сайын төмендеуі мүмкін.

Саясаттанушы жағдайдың бұлай болуын гуманитарлық апат деп атады.

Әрине, халық санының өсуі — экономикалық өсу факторы. Тіпті ұлттық қауіпсіздікті нығайтуға ынталандырады деген пікір бар. Дегенмен іс жүзінде біз халық саны көп аймақтардағы бақылаусыз туу туралы айтып отырмыз.

Бұл экологиялық, экономикалық, әлеуметтік инфрақұрылымға шамадан тыс қысым және мегаполистерге миграциялық қысым жасайды. Мегоаполистер көші-қонның қазіргі деңгейін және тұрғындарының жоғары туу көрсеткішін қорыта алмай отыр,

деді Данияр Әшімбаев.

Ол еліміз денсаулық сақтау мен білім беру саласына арналған инфрақұрылымды дамытуға үлгере алмай жатқанын айтып өтті. Оған қоса, қазірдің өзінде жұмыс орындарының айтарлықтай тапшылығы бар екенін және жаңа азаматтардың көпшілігі жүйелі жұмыссыздыққа ұшырағанын ұмытпаған жөн.

Айта кетейік, Ұлттық статистика бюросы мәліметі бойынша, Қазақстан халқы саны 2022 жылғы 1 шілдеге қарай жыл басынан бері 123,9 мың адамға артып, 19 миллион 246 мың адамға жеткен.