Қазақстандық саясаттанушы және белсенді Данияр Әшімбаев халық қалаулыларының жұмысын бақылап отыру үшін оларға чиптерді енгізуді ұсынды.

Саясаттанушы бұл ұсынысымен өзінің Telegram желісіндегі парақшасында бөліскен.

Мәслихат институтын жаңғырту аясында депутаттарға арнайы чиптер енгізуді ұсынамын, оның көмегімен сайлаушылар депутаттардың өз округтерінде болуын бақылап, жұмысын қадағалайды,

деп жазды Әшімбаев.

Чип енгізу бойынша осыдан бірнеше күн бұрын әлеуметтік желіде Павлодар қалалық мәслихатының депутаты Гүлжайна Дәрімованың ерекше ұсынысы жарияланған болатын. Депутат әлеуметтік жағдайы төмен отбасынан шыққан балаларға чип салуды ұсынып, даудың астында қалған еді.

Тұрмыстық жағдайы төмен отбасыдан шыққан балаларды кешкі уақытта тексеру керек немесе чип қою керек. Өйткені, көп жағдайда түнгі мезгілде олардың қайда екенін білмейміз. Тіпті, мен олардың денесіне чипті тігіп қоюды ұсынар едім,

деп мәлімдеді депутат әлеуметтік желіде.

Алайда желі қолданушылары депутаттың ұсынысын қатты сынап тастады.

Қиын балаларға чип салу керек дедім. Балаларды ұратындар қоғам үшін қауіпті. Алайда әдеттегідей, бәрі бұрылып, мені мазақ етеді. Жақсы хайп. Менің парақшамда оқырман санын көбейтіңіздер,

деп жазды Гүлжайна Даримова.