Биыл елімізде 99 адам тұрмыстық зорлық-зомбылықтан көз жұмған.

Биылғы қаңтар-қараша айларында Қазақстанда отбасылық-тұрмыстық жанжалға қатысты ресми түрде 841 қылмыстық құқықбұзушылық тіркелді. Бұл бір жыл бұрынғы көрсеткіштен 6,9 пайызға аз.

Energyprom.kz мамандарының салыстыруынша, 2021 жылдың қаңтар-қараша аралығында 903 отбасылық және тұрмыстық қылмыстық құқықбұзушылық тіркелген, бұл алдыңғы жылмен салыстырғанда 7,7% аз көрсеткіш.

Отбасылық-тұрмыстық жанжалдан шыққан қылмыстық құқықбұзушылықтардың басым бөлігі Шығыс Қазақстан облысында тіркелген: өңірде бір жыл бұрын 135, ал биыл 100 дерек тіркелген.

Сондай-ақ Алматы (87 жағдай), Қарағанды ​​(80 жағдай), Павлодар (80 жағдай) және Қостанай (72 жағдай) облыстарында да осы тәріздес құқықбұзушылықтар саны біршама көп болып отыр.

Аталған құқықбұзушылық саны бойынша ең аз дерек жаңадан құрылған үш өңірде – Абай (3), Ұлытау (4) және Жетісу (5) облыстарында тіркелді.

Тіркеуге алынған істердің 97,6%-ы жеке тұлғаға қарсы қылмыстық құқықбұзушылыққа жатады. Басым бөлігі денсаулыққа қасақана ауыр (327 іс) және орташа ауырлықтағы (295 жағдай) зиян келтіру, сондай-ақ кісі өлтіру (99 іс) болды,

делінген зерттеуде.

Тұрмыстық зорлық-зомбылық жасаушылардың арасында меншікке қарсы қылмыстық құқықбұзушылықтар (9 іс) және басқаруға қарсы қылмыстық құқықбұзушылық (4 жағдай) жасағандар да кездесті.