Өңірде 40 градус аяз.

ШҚО-да мектептерде сабақ уақытша тоқталып, оқушылар қашықтан білім алды. Өскемен жылу электр орталығының жұмысы да сыр берді. Ал қала жастары мен кей мекеме мамандары көше тазалап жүрген жұмысшылар мен аялдамадағы жолаушыларға ыстық шай тараттты, деп хабарлайды Хабар 24 телеарнасы.

Қатты аязда Өскемен жылу электр орталығы пәтерлерді жылыта алмай жатыр. Желідегі су мөлшері көбейіп, салдарынан температура түсіп кеткен. Тұрғындар баспанасының салқындап кеткенін айтып шағымдануда. Дегенмен жылу станциясында ақау болғанын мамандар жасырмады. Қазандық агергаттарының бірінде датчик істен шыққан. Бірақ екі сағат ішінде жөнделген. Енді су айналымы қалыпқа келгенше шыдауға тура келеді.

Қазір станция қызметі штаттық режімде. 7 қазандық 6 турбоагрегат жұмысы істеп тұр. Дегенмен жөндеу жұмыстары әлі де жалғасып жатыр. Станция қуатын азайтып, желідегі температураны арттырған. Ішкі шаралар аяқталған соң, барлығы реттеледі деп уеде етті басшылық.

Шыңылтыр аяз шаһардағы көлік қозғалысын қиындатты. Қоғамдық транспорттың 40 проценті желіге шықпады. Жүріп жүргендері де жиі сынып жатыр. Оны ауыстыратын келесі көлік шыққанша аялдама адамға лық толады. Аязға шыдамай электр сымдары үзілген трамвайлардың да бірнешеуі тұралап тұр.  Дегенмен автопарк қазір күшейілген тәртіпке көшіпті.

Сондай-ақ қала жастары болса қайырымдылық жасауға көшті. Автобустарын сарыла күткен аялдамадағы жолаушыларға ыстық шай, бәліш таратты.  Олар күн райы қандай болса да міндетін мінсіз орындайтын коммуналдық сала жұмысшыларын да ұмытпады.

Жастардың ізгі ісін қылмыстық атқару жүйесі комитетінің қызметкерлері де іліп әкетті. Олар да аяздан домбыққан тұрғындарға ыстық сусын мен бауырсақ таратып, қайырлы істі жалғастыруға шақырды. Синоптиктер болса түнде облыста сынап бағанасы 36-38 кей жерде 43 градусқа дейін төмендеуі мүмкін дейді. Ал ертең аяз сынады. Өскеменде күндіз 21-23 градус суық болады деп болжанды.