Мемлекет басшысы Қасым-Жомарт Тоқаев Абай облысының тұрғындарымен кездесіп, өңірдегі маңызды мәселелерге тоқталды. Аймақтың экологиялық ахуалын жақсарту, жастардың дамуы, әлемдік қақтығыстар жайлы айта келіп, президент қазір жалған ақпараттардың тарап жатқанын жеткізді.

Оның айтуынша, анонимді боттардың фейк мәліметтерді таратуы елімізде президент сайлауы өтетін күн белгілі болғаннан кейін басталған.

Қазір елімізде үлкен саяси науқан басталды. Әрине, сайлау болғаннан кейін түрлі пікірталастар болады. Сонымен қатар, ел мүддесіне кереғар пікір айтатын, тіпті, жалған ақпарат тарататын адамдар пайда болуы мүмкін. Біз осыған сақ болуымыз қажет.

Сайлау жарияланған соң түрлі жалған деректер, ақпарат, яғни фейктер таратылып, кибершабуылдар күшейді. Бұл жайдан жай емес. Кейбір күштер шетелден осындай әрекеттерді ұйымдастырып, ел ішіне іріткі салуды көздейді. Олар Қазақстанда оң өзгерістерге кедергі жасағысы келеді. Бірақ біз бағытымыздан таймаймыз,

деді Тоқаев.

Сонымен қатар мемлекет басшысы Еуразия құрлығының ортасында орналасқан Қазақстанның бүгінгі таңдағы халықаралық ахуалға қатысты ұстанымын тағы да қайталап айтты.

Бүгінде әлемде бұрын-соңды болмаған геостратегиялық шиеленіс байқалады. Әлемнің түкпір-түкпіріндегі саясаткерлер мен сарапшылар ядролық қарудың қолданылу қаупін қызу талқылап жатыр. Семей ядролық полигонындағы соңғы жарылыстан бері 33 жылға жуық уақыт өтті. Бұл аймақтың тұрғындары «Қырғи-қабақ соғыстағы» ядролық әлеуетпен ақылға қонымсыз бәсекелестіктің барлық қиындығын бастан өткерді. Жақында мен бұл туралы Нью-Йорктегі БҰҰ-ның жоғары мінберінен айттым. Адамдардың денсаулығына, жергілікті экожүйеге орасан зор залал келді. Тұңғыш Президент Нұрсұлтан Назарбаевтың Жарлығымен полигонды жауып, әлемдегі төртінші ядролық арсеналдан өз еркімен бас тарта отырып, біздің еліміз ядролық қарусыз әлем үшін жаһандық қозғалыс көшбасшыларының біріне айналды,

деді президент.

Еске сала кетейік, отандық БАҚ-та және әлеуметтік желілерде соңғы кездері Ресей мен Украина арасындағы соғыс, мобилизациядан қашқан ресейлік азаматтардың Қазақстанға келуіне байланысты оқиғалар қоғамда резонанс туғызды. Бұл ретте ел президенті мен құзырлы органдар мемлекет тарапынан ұстанымдарын ашық білдірген.