Мемлекет басшысы Қасым-Жомарт Тоқаев Еуропалық кеңес төрағасы Шарль Мишельмен келіссөз жүргізді.

Шарль Мишельді қарсы алған мемлекет басшысы Еуропалық Одақпен стратегиялық әріптестікті дамыту әрқашан Қазақстанның сыртқы саясатындағы басты басымдықтардың бірі болғанын атап өтті.

Сіздің сапарыңыз Қазақстан мен Еуропалық Одақ арасындағы әріптестік ауқымындағы елеулі жетістіктерді атап өтуге тамаша мүмкіндік береді. Келер жылы біз айтулы дата – дипломатиялық қарым-қатынастың орнағанына 30 жыл толуын атап өтеміз. Сіздің Қазақстанға ресми сапарыңызды біздің қарым-қатынастарымызды жаңа деңгейге көтеруге өзара мүдделіліктің тағы бір дәлелі деп санаймыз,

деді президент.

Қасым-Жомарт Тоқаев Қазақстан Еуропалық Одақпен кеңейтілген әріптестік пен ынтымақтастық туралы келісімге қол қойған Орталық Азиядағы бірінші және жалғыз мемлекет екенін айтты.

Мемлекет басшысы жоғары деңгейдегі тұрақты байланыстар Қазақстан мен ЕО арасындағы жан-жақты диалогты дамыту мүмкіндіктерін нығайтады деп санайды.

Еуропалық кеңес төрағасы Шарль Мишель Тоқаевқа қонақжайлылығы үшін алғысын білдіріп, Қазақстан мен ЕО арасындағы ынтымақтастықтың қарқынды дамып келе жатқанын айтты.

Біз алғаш Брюссельде кездестік, содан бері тығыз байланыста болып, түрлі салада жұмыс істеп келеміз. Өңірлік деңгейде бірлескен жұмыстың маңыздылығын атап өтемін. Ынтымақтастығымыздың өзекті мәселелерін, соның ішінде климаттың өзгеруіне қатысты мәселелерді талқылау мақсатында Сізбен кездескеніме қуаныштымын.

деді Шарль Мишель

Кездесу барысында тараптар энергетика және азық-түлік қауіпсіздігі, «жасыл» экономиканы дамыту, көлік және логистика мәселелерін жан-жақты талқылады. Мемлекет басшылары Орталық Азия – Еуропалық Одақ форматындағы ынтымақтастықты дамыту мәселелері бойынша пікір алмасты.