Мәжіліс төрағасы Ерлан Қошанов V Дүниежүзілік көшпенділер ойындарын 2024 жылы Қазақстанда өтетінін айтты. Бұл туралы Ақорда хабарлады.

Президент Мәжіліс төрағасы Ерлан Қошановты қабылдады. Мемлекет басшысына Парламент Мәжілісінің қазіргі заң шығару қызметі туралы ақпарат берілді. Соның ішінде, Мәжіліс депутаттары «Адам құқықтары жөніндегі уәкіл туралы», «Конституциялық сот туралы», «Прокуратура туралы» заң жобаларын және бірқатар конституциялық және басқа да заңға енгізілетін өзгерістерді қарастырып, Сенатқа жолдады. Бұл құжаттарды талқылауға эксперттер тобы қатысты. Талқылаулар қоғам мен БАҚ-қа жария түрде өтті.

Палата мақұлдаған заң жобалары биылғы 5 маусымда өткен референдумда халық дауыс берген конституциялық реформалардың негізгі ережелерін жүзеге асыруға бағытталған. Енгізілетін заң нормалары азаматтардың конституциялық құқықтары қорғалуын күшейтуге және тұрғындардың еліміздің саяси өміріне араласу мүмкіндігін кеңейтуге септігін тигізеді,

делінген хабарламада.

Ерлан Қошанов мемлекет басшысына парламенттік дипломатия және шет мемлекеттердің заң шығарушы органдарымен арадағы іс-әрекеттер аясындағы жұмыстардың негізгі басымдықтары туралы айтты.

Мәжіліс төрағасы президентке Түркияның Изник қаласында өткен IV Дүниежүзілік көшпенділер ойындарының салтанатты ашылу рәсіміне еліміздің делегациясының қатысқаны жөнінде баяндады. Түркі қоғамдастығы 2024 жылы V Дүниежүзілік көшпенділер ойынын Қазақстанда өткізу жөніндегі ұсынысты бірауыздан қолдады.