Премьер-министр Әлихан Смайылов азық-түлік бағасына жауапты бірқатар шенеунікті жауапкершілікке тартуды тапсырды. Бұл туралы Primeminister.kz хабарлады.

2020 жылғы 10 айда азық-түлік инфляциясы 20,5%-ке жеткен.

Жұмыртқа 7,6%-ке, ұн 3,9%-ке, күріш 3%-ке, сүт 2,2%-ке қымбаттаған. Сонымен қатар бір апта ішінде сәбіз (0,8%), картоп (0,6%), қант және қырыққабат (0,1%) құны төмендеген.

Биыл ауыл шаруашылығын субсидиялау екі есеге ұлғайтылды, бірақ оны алатындардың азық-түлік бағасын 20%-ға көтергенін көріп отырмыз. Мұндай жағдайға көне алмаспыз. Біз субсидия берсек, онда олар қарсы міндеттемелер қабылдауы керек. Субсидиялау жүйесі нақты жұмыс істеуге тиіс,

деді Әлихан Смайылов.

Премьер-министр Әлихан Смайыловтың айтуынша, министрліктер мен әкімдіктерде әлеуметтік маңызы бар азық-түлік тауарларының бағасын реттеу үшін барлық қажет құрал бар. Бірақ азық-түлік әлі арзандамай отыр.

Бұл – әкімдіктердің әлсіз жұмысының және Ауыл шаруашылығы, Сауда және интеграция министрліктері тарапынан үйлестірудің жеткіліксіздігінің нәтижесі,

деді Әлихан Смайылов.

Сол себепті үкімет басшысы Сауда және интеграция министрлігіне осы бағытқа жауапты лауазымды тұлғаларды тәртіптік жауапкершілікке тартуға ұсыныс енгізуді, Сауда комитетінің төрағасын қызметінен босатуды тапсырды.

Сөз соңында ол қияр, қызанақ және жұмыртқа сияқты тауарлардың бағасы жиі өсетінін, сондықтан оған қатысты нақты шаралар қабылдау қажет екенін атап өтті.

Негізгі жеткізушілердің кім екенін, бағаның неге өсіп жатқанын анықтау керек. Олар өз маржаларын бағаны көтерудің есебінен алса, онда нарықтық ортада жұмыс істесін, ал біз субсидияларды басқа бағыттарға жұмсаймыз. Бұл ретте өңірлерде рұқсат етілген сауда үстемесіне және арнайы комиссиялардың жұмысына мониторингті жүйелі жолға қою қажет. Әріптестер, әлеуметтік маңызы бар азық-түлік өнімдерінің негізсіз өсуіне жол бермеу жөніндегі жұмысты күшейтуді сұраймын. Құралдардың бәрі бар,

деп түйіндеді Әлихан Смайылов.