Жылыой ауданында өткен жылдан бері функционалдық сауаттылықты дамытуға және мектептегі білім сапасын арттыруға бағытталған «Теңіз ұстазы» білім беру жобасы жүзеге асырылып келеді.

Жоба «Жаңа білім беру бастамалары» қоғамдық қоры тарапынан «Теңізшевройл» компаниясының және Жылыой ауданы әкімдігінің қолдауымен іске асуда. Жоба аясында Жылыой ауданының мыңнан астам педагогы оқытудан өтті.

Жоба практикалық бағытта құралған. Алғашқы кезеңде мұғалімдер LMS-платформада онлайн оқудан өтті. Бұл – қашықтан оқытуға арналған цифрлық білім беру ортасы, онда оқу курстары, тапсырмалар және кері байланыс құралдары орналастырылған. Оқу барысында мұғалімдер функционалдық сауаттылықты дамытуға арналған заманауи әдістемелермен танысып, оқушылардың білімді практикада қолдану қабілетін бағалайтын халықаралық PISA зерттеуі форматындағы тапсырмалармен жұмыс істеуді меңгерді.

Онлайн оқудан кейін педагогтер Құлсары қаласында өткен офлайн форматтағы қарқынды семинардың жұмысына қатысты. Бұл формат теориядан тәжірибеге көшуге мүмкіндік берді. Қатысушылар нақты сабақтарды талдап, мектеп өміріндегі күрделі жағдайларды талқылап, білімді механикалық түрде қайталауға емес, талдау жасауға, ой қорытуға және қолдануға бағытталған тапсырмаларды құрастыруды үйренді.

5–9 қаңтар аралығында оқу 40 сағаттық дәстүрлі форматтағы оқу курсы форматында жалғасты. Мұғалімдер төрт бағыт бойынша жұмыс істеді: бастауыш сыныптағы функционалдық сауаттылық, математикалық, жаратылыстанулық және оқырмандық сауаттылық. Оқу үдерісінде бірден қолдануға болатын тапсырмалар мен сабақтарды әзірлеуге ерекше назар аударылды.

Оқу барысында педагогтер сабақтың жекелеген бөліктерін жоспарлап, оқушылардың жауаптарын талдады. Сондай-ақ оқушыларды өз ойын дәлелдеп айтуға, ақпаратпен жұмыс істеуге және қорытынды жасауға қалай үйрету керектігін талқылады. Бұл тәсіл мұғалімдерге жаңа әдістемелерді меңгеріп қана қоймай, оларды өз мектептерінің нақты жағдайына бейімдеуге мүмкіндік берді.

Оқу циклының қорытынды кезеңі ретінде педагогикалық шеберлік байқауы өтті. Курстар аяқталғаннан кейін мұғалімдер өздерінің әдістемелік шешімдерін ұсынып, оларды тәжірибе жүзінде көрсетуге дайын екендігін білдіріп, байқауға өтінім берді. Байқау алынған білімнің қаншалықты игеріліп, нақты жұмысқа енгізілгенін айқындайтын маңызды кезеңге айналды.

27–29 қаңтар аралығында байқаудың екінші, финалдық кезеңіне өткен педагогтердің сабақтарына байқау комиссиясы қатысып, бағалау жүргізді. Сарапшылар сабақтың мазмұнымен қатар мұғалімдердің оқушылармен жұмысты қалай ұйымдастыратынына, сұрақ қоюына, проблемалық жағдайлар туындатуына, оқушыларды талқылауға тартуына және білімді стандарттан тыс жағдайда қолдануға бағыттауына назар аударды.

Атап өту керек, «Теңіз ұстазы» жобасы аясындағы байқау жарыс үшін емес, педагогтердің кәсіби дамуын қолдауға және мектептердегі нақты өзгерістерді көрсетуге бағытталған. Мұғалімдер үшін бұл кәсіби кері байланыс алу мүмкіндігі болса, ауданның білім беру жүйесі үшін заманауи тәсілдердің мектептерде қалай іске аса бастағанын көруге мүмкіндік береді.

Ол функционалдық сауаттылықтың теориялық қана емес, сабақ барысында қалыптасатын және білім сапасына тікелей әсер ететін нақты дағдылар жиынтығы екенін көрсетті.