Қазақстанда мүлік салығын уақтылы төлемейтіндер көп. ҚР Мемлекеттік салық комитетінің хабарлауынша, былтырғы жылдың салығын 1,8 млн. меншік иесі әлі күнге дейін төлемеген. Ал олардың барлығы төлеуі керек салық мөлшері — 7,1 млрд. теңге.
Салық заңнамасына сәйкес алдағы уақытта төлеу керек салық туралы хабарламалар биыл шілде айында мүлік иелеріне жіберілген. Бұдан басқа, «Каспий банк» АҚ мобильді қосымшасын пайдаланушыларына PUSH-хабарламалар түрінде жіберілді. Ескертуге қарамастан, салық төлеуге асықпайтындар көп боп тұр.
Осыған байланысты, Мемлекеттік кірістер комитеті 2022 жылғы 2 қазаннан бастап жеке тұлғалардың салық берешегі туралы хабарламаларды борышкерлерге жіберетінін ескертті.
1 айлық есептік көрсеткіштен астам берешек сомалары бойынша хабарлама табыс етілген соң отыз жұмыс күнінен кейін берешекті мәжбүрлеп өндіріп алу туралы салық бұйрығы жіберіледі. Бұл салық бұйрығы 5 жұмыс күні өткеннен кейін жеке сот орындаушыларына мәжбүрлеп өндіріп алу үшін беріледі.
Бұл ретте, жеке сот орындаушылары берешек сомасынан басқа шоттарға тыйым салу және шығуға шектеу қоюдан туындаған қолайсыздықтар туралы айтпағанда, салық берешегі сомасының 25%-на дейінгі мөлшерде қосымша төлемді өндіріп алады.
Айта кетейік! Салықты «e-Salyq Azamat» және екінші деңгейдегі банктердің мобильді қосымшалары, «Электрондық үкімет» порталы арқылы, екінші деңгейдегі банктердің бөлімшеріндегі немесе төлем терминалдарындағы қолма-қол ақша қаражатымен, сондай-ақ банкоматтар мен төлем терминалдарындағы банк карталары арқылы төлеуге болады.
Ал 2022 жылғы 1 қазанда жылжымайтын мүлік және жер учаскелерінің меншік иелерінің 2021 жылға есептелген мүлік салығын төлеу мерзімі аяқталады.
