Былтыр желтоқсанда мәжіліс «Тұңғыш президент — Елбасы» туралы Конституциялық заңның күшін жою процесін бастаған. Экс-президент және оның семьясы 22 жыл бұрын қабылданған «Елбасы заңының» қызығын әбден көрді. Енді болды. Қызық аяқталды. Себебі заңның түпкілікті күшін жоятын сәтке дейін небәрі 24 сағат қалды.

Заңға сай: Назарбаев пен оның отбасы қылмыстық жауапкершілікке тартылмайды, қамалмайды, мүліктері тәркіленбейді, шектеу қойылмайды. Назарбаев және оның отбасы мүшелерінің  «банктік шоттарының құпиялығына және  банк шоттарына тиіспеуге кепілдік берілетіні» жазылған.

«Елбасы заңы» Қазақстандағы автократия мен әділетсіздіктің айқын көрінісі еді.

Мәжіліс спикері Ерлан Қошанов парламент палаталарының бірлескен отырысына шақыру жөніндегі жарлыққа қол қойды. Жиын ертең, сағат 10.00-да өтеді.

Бірлескен отырыста «Тұңғыш президент — Елбасы» туралы заңның күшін біржолата жою мәселесі қаралуы мүмкін. Бірер күн бұрын Қазақстанның Конституциялық соты бір топ депутаттың өтінішін қарап, «Тұңғыш президент — Елбасы» заңның күшін жойған.

Конституциялық сот бұл шешім «маусымда өткен референдум» мен «қазақтардың қалауын ескеріп шығарылғанын» айтады.

Сот «2022 жылғы 5 маусымдағы референдумды назарға алып, тұңғыш президент – елбасының мәртебесі мен өкілеттігін, оларды Конституциялық заңмен регламенттеу мүмкіндігін, Конституциялық кеңеске өмір бойы мүшелігін, сондай-ақ оның артықшылықтарын – мәртебесінің өзгермеуін, қатарынан 2 реттен артық президент болып сайлану құқығын Ата заңнан сылып алып тастады» дейді.

Конституциялық сот қаулы бірден күшіне енетінін, шағымдануға жатпайтынын мәлімдеді.