Нәрестелерді тауарға айналдырғандар желіде ашық саудаласуда.

Қырық апта құрсағында жатып, мынау жалғанды көрсем деп тыпыршыған шақалағын далаға да, қалаға да, тіпті қоқыс жәшігіне тастап кету оқиғалары көбейді.

Анасы өз қолымен өлтірген өлі шарананы да, шырылдай жылаған шақалақты да, бір өкініштісі, перзентханадан емес, дәретханадан алып шығатын болдық. Көкірегің қарс айырылады. Шарасыз ана мен жауапсыз әкеге лағнет айтқанмен, мұндай қатыгездік тыйылмай тұр.

Біздің қоғамда одан да сорақы дерт — бала сату деген пайда болды. Естіп те, көріп те жатырсыздар, бірі бауыр еті баласын автокөлікке, енді бірі 2 бөлмелі пәтерге, тіпті кейбірі 40-50 мың теңгеге дейін сатып жібереді. Дене түршікпейді, Құдайдан қорықпайды.

“Астана” телеарнасының хабарлауынша, қазір әлеуметтік желіде жұрт ашықтан-ашық «бала асырап аламын, рақметім болады» деп жазса, енді бірі «300 мың теңге беремін» деп жаңа туған сәбиге нақты баға қойған. «Жазыңдар, бере саламын» дейтін тасбауыр әйелдер мен делдалдар да кездеседі.

Бұл бала сату ауыр және аса ауыр қылмыстардың түріне жатады. Ең ауыр жаза 18 жылға дейін бас бостандығынан айыру түрінде қарастырылған,  

дейді ІІМ ұйымдасқан қылмысқа қарсы күрес департаментінің аға жедел уәкілі Нұрбол Ашақұлов.

Көбіне бұл қылмыс түрі жасырын істеледі. Көрген, не естіген адамдардың, куәгерлердің ақпараттандыруы арқылы жедел іздестіру шараларымен анықталады дейді департамент өкілі. Соңғы 5 жылда бала сатудың 44 дерегі анықталған. Ал биылдың өзінде 9 қылмыстық іс тіркеліпті.

Мәселенің тағы бір ұшы белсіздік пен бедеулікке тіреледі. Мамандардың айтуынша, елімізде ерлі-зайыптылардың 15 пайызы бала сүю бақытынан айырылған. Сәби сүйе алмағандықтан 20 пайыз отбасының некесі бұзылады екен.