5 қазан мен 8 қараша аралығында Green Card лотореясы басталды.
Жыл сайын әлемнің әр қиырынан Америкаға барғысы келетін миллиондаған адам лотореяға қатысады. 2021 жылы 1223 қазақстандық Green Card ұтып алды, деп хабарлайды Halyq Uni.
Жасыл карта – бұл АҚШ-та жұмыс істеуге рұқсат беретін құжат. Оны толыққанды төлқұжат ретінде де пайдалануға болады.
Карта 10 жыл мерзімге беріледі. Алайда оны алғаннан 5 жылдан кейін АҚШ азаматтығына да тапсыруға болады.
Бір сөзбен айтқанда жасыл куәлік америкалықтарға заңмен берілген барлық игілікті көруге құқық береді. Тек бірқатар шектеулер бар:
- Дауыс беруге;
- Мемлекеттік медициналық көмек алуға;
- Мемлекеттік қызмет істеуге болмайды.
Жасыл карта лотореясы жыл сайын ойнатылады. Жыл сайын бұл ұтысқа әлемнің әр түкпірінен миллиондаған адам қатысып, бақ сынайды. Алайда шамамен 100 мың адам ғана ұтысқа ие болады. Өтініштер бірнеше талап бойынша қабылданады. Атап айтқанда:
- Орта білімнің болуы;
- Денсаулығы жақсы;
- Қылмыс жасамаған болуы керек.
Өтінішті дұрыс толтырып, сапалы сурет ұсынған адамның ұтысқа ие болу мүмкіндігі жоғары. Содан соң үміткер сұхбатқа шақырылады. Нәтижесінде 40-50 мың адам визаға ие болады.
Статистика соңғы жылдары жасыл карта ұтысына қатысып жатқан қазақстандықтардың қатары көбейіп жатқанын көрсетіп отыр. АҚШ-қа кетуді армандайтын қазақстандықтар саны 2008 жылдан бері 10 есе көбейген.
2008 жылы 8,8 мың адам қатысса, 2018 жылы 82 мың өтініш берілген. Сондай-ақ 2021 жылы виза алу үшін 2019 жылдың ұтысына 67 593 қазақстандық қатысқан. Оның 2406-ы аталған ұтысқа ие болды.
Ал 2018 жылы 886 адам, 2019 жылы 1 584 адам жасыл картамен Америкаға кеткен екен.
Айта кетейік, америкалық визаны алуға кез келген адам өтініш бере алады. Әрі отбасының бір мүшесі ұтса, қалған мүшелері автоматты түрде виза ала алады. Өтінім қабылдау қарашаның басында аяқталады, ал нәтижесін 2023 жылдың мамыр айында сайттан билет нөмірін енгізу арқылы білуге болады.
Виза ұтысына қатысу үшін АҚШ Мемлекеттік департаментінің ресми сайтына кіріп, сауалнаманы ашып, оның барлық бағандарын дұрыс толтыру қажет.
