Қаңтар қырғыны кезінде экс-қорғаныс министрі Мұрат Бектанов заңсыз бұйрық берген. Бұл туралы мәжіліс отырысында бас прокурор Берік Асылов мәлімдеді.

Тергеуге сәйкес, ол төтенше жағдай кезеңінде көрінеу заңсыз бұйрық берген және стратегиялық объектілерді әскерилердің күзетінсіз қалдырған. Бұрынғы Қорғаныс министрі елімізде конституциялық тәртіп орнату жөнінде шаралар қабылдамаған,

деді бас прокурор.

Бас прокурордың сөзінше, тәртіпсіздікке қатысушылар, әсіресе Алматыдағылар саны жағынан басым болған. Олар қоршауды бұзған, полиция мен Ұлттық ұлан күштерін басып, халыққа зорлық-зомбылық жасаған. Соның салдарынан қылмыскерлердің қолынан көптеген адам қаза болып, қалалар тоналып, өртелген.

Бектанов ұрыс жағдайында жасалған билікті асыра пайдалану бойынша айыпталып жатыр (ҚК-нің 451-бабының 3-бөлігі). Сот оның іс-әрекеттеріне түпкілікті баға береді және оның жазасын анықтайд,

деді Берік Асылов.

19 ақпанда Бас прокуратура бұрынғы Қорғаныс министрі Мұрат Бектановқа қызметтегі әрекетсіздік фактісі бойынша Қазақстан Республикасының Қылмыстық кодексiнің 452-бабымен сотқа дейінгі тергеп-тексеруді бастады. 20 ақпанда Мұрат Бектанов ұсталып, уақытша ұстау изоляторына қамалды.