Алматыда автобус жүргізушісі есірткіге мас күйінде жолаушылар тасымалдаған. Бұл туралы Полиция департаменті баспасөз қызметі хабарлады.
Бұл — 118-ші бағыттағы қоғамдық көлік жүргізушісі. Оны Абай даңғылы мен Өтеген батыр көшесінің қиылысында әкімшілік тәжірибе бөлімшесі қызметкерлері тоқтатты.
Жүргізушінің әрекеті күдік туғызды. Оны медицина тексеруінен өткізу үшін ертіп әкетті. Сараптама қорытындысы бойынша нарколог-дәрігерлер оның есірткіге мас болғанын анықтады. Жүргізуші бірден қоғамдық көлікті басқарудан шеттетілді. Алматы қаласы бойынша мамандандырылған ауданаралық әкімшілік сотының шешімімен ер адам 8 жыл мерзімге көлік құралын басқару құқығынан айырылды. Сонымен қатар, 15 тәулікке әкімшілік қамаққа алынды. Қоғамдық көлік мамандандырылған айыппұл тұрағына қойылды,
деді Әкімшілік полиция басқармасы бастығының орынбасары Дәулет Сейітқұлов.
Оған қоса, есірткі шеккен жүргізушіні көлік айдауға шығаруға рұқсат берген автокәсіпорынның медицина қызметкеріне қатысты ҚР ӘҚбК-нің 619-бабы бойынша әкімшілік шара қолданылды. Айыппұл сомасы 150 мың теңген болды.
